Almatyda jastar úshin 2,5% tómen paıyzdyq mólsherlememen shaǵyn nesıeleýge ótinimderdi qabyldaý jalǵasýda. Baǵdarlamanyń agenti "Agrarlyq kredıttik korporasıa" AQ bolyp tabylady, nesıeleý bóliminiń bas mamany Qanat Omarov ÓKQ brıfıńinde nesıe berý rásimi týraly egjeı-tegjeıli aıtyp berdi, dep habarlaıdy Almaty-akshamy.kz
Negizgi talaptardyń ishinde ótinim berý sátinde jeke kásipker retinde tirkelý merzimi 5 jyldan aspaýǵa tıis. 21-35 jas aralyǵyndaǵy jas kásipkerler men jumysshy jastar jeńildetilgen nesıe alýǵa úmitker bola alady.
"Osy baǵdarlamamen Qazaqstan Respýblıkasy boıynsha 28,9 mlrd teńge bólindi, onyń ishinde Almaty jastary úshin 4,8 mlrd teńge bólindi. Bul myńǵa jýyq kásipker men jastar. Almaty qalasy boıynsha 350 kásipker men jastarǵa keńes berildi, 71 kásipker boıynsha ótinimder qabyldandy, olardyń tórteýi komısıanyń qaraýyna jiberildi", - dedi Q.Omarov.
Shaǵyn nesıe somasy mal sharýashylyǵy salasyndaǵy jobalar úshin - 7 jylǵa deıin, bıznestiń basqa baǵyttary úshin - 5 jylǵa deıin óteý merzimimen 5 mln teńgege deıin quraıdy. Shaǵyn nesıe merziminiń uzaqtyǵynyń úshten birine deıingi negizgi borysh pen syıaqyny óteý boıynsha jeńildikti kezeń kózdelgen.
Kepilmen qamtamasyz etýdiń bolýy mindetti shart bolyp tabylady. Kepilmen qamtamasyz etý túrinde jyljymaly jáne jyljymaıtyn múlik qabyldanady. Kepilmen qamtamasyz etý bolmaǵan jaǵdaıda úshinshi tulǵalardy kepil berýshi retinde tartýǵa bolady (ata-analary, týystary jáne t.b.).
Nesıeleý boıynsha sheshimdi qala ákimdigi janynan qurylǵan arnaıy komısıa qabyldaıdy. Komısıaǵa qalalyq máslıhat depýtattary, memlekettik organdardyń, "Atameken" kásipkerler palatasynyń, bıznes-qoǵamdastyq pen BAQ ókilderi kiredi.
Qajetti qujattar tizimi:
1. jeke basyn kýálandyratyn qujat;
2. joba boıynsha bıznes-jospar;
3. shottyń bolýy týraly qyzmet kórsetetin bankten anyqtamalar;
4. qarjy uıymdarynan (kredıtter bolǵan kezde)kredıttik bereshektiń, onyń ishinde merzimi ótken bereshektiń bolýy týraly anyqtamalar;
5. qatysýshynyń/úmitkerdiń jalaqysyn jáne (nemese) ózge de tabystaryn rastaıtyn qujat (jınaqtaýshy zeınetaqy qorynan úzindi kóshirme) bolǵan kezde;
6. kepildi qamtamasyz etý retinde beriletin múlikti baǵalaý týraly esep;
7. kepil berýshi jáne kepilmen qamtamasyz etý jónindegi qujattar.
Ótinim berý úshin Sátbaev kóshesi, 5 mekenjaıyndaǵy "Agrarlyq nesıe korporasıasy" AQ fılıalyna qujattardy tapsyrý qajet. Shaǵyn nesıeler boıynsha. tolyq aqparatpen korporasıanyń agrocredit.kz.saıtynda tanysýǵa bolady