Búgingi jastar – sıfrlyq zamanda ómir súrip jatqan urpaq. Tehnologıanyń únemi damýy, jahandaný men áleýmettik ózgerister olardyń ómir súrý stılin, qundylyqtaryn jáne qoǵamdaǵy ornyn ózgertip jatyr.
Jastar álemniń kez kelgen túkpirinen aqparat ala alady, óz pikirin ashyq bildirip, ıdeıalarymen bólisedi. Áleýmettik jeliler men túrli platformalar olar úshin tek qarym-qatynas jasaý ǵana emes, jumys tabý, oqý, jańa daǵdylardy meńgerý quralyna aınalǵan. Búginde jastar blogtar júrgizip, YouTube, Instagram sıaqty jelilerde jumysyn kórsetýge umtylady.
Degenmen, bul sıfrlyq álemde ómir súrý psıhologıalyq qysym men áleýmettik oqshaýlanýǵa da ákelip soǵýy múmkin. Máselen, áleýmettik jelilerde basqa adamdardyń jetistikterin kórip, ózin solarmen salystyryp, nátıjesinde ózin-ózi baǵalaýy tómendep, depressıaǵa ushyraýy yqtımal. Bul problemalardyń aldyn alý úshin jastarǵa psıhologıalyq qoldaý kórsetý mańyzdy.
Qazirgi jastar bilimge erekshe mán berip, ony tek teorıalyq negizde emes, praktıkalyq tájirıbemen ushtastyrýǵa tyrysady. Olardyń qyzyǵýshylyǵy aqparattyq tehnologıalar, robototehnıka, jasandy ıntellekt jáne ekologıa sekildi baǵyttarǵa artyp otyr. Bul salalar olardy jańa ıdeıalarǵa, startaptar jasaýǵa yntalandyrady. Sonymen qatar, qazirgi zamandastarymnyń kópshiligi áleýmettik jaýapkershilikti sezinip, qorshaǵan ortaǵa, teńsizdikke jáne ádildikke qatysty máselelerdi sheshýge belsendi qatysýda. Ekologıalyq qozǵalystarǵa, volonterlik jobalarǵa qosylyp, álemdi jaqsartý úshin kúsh salyp júrgen jastardyń sany kún sanap artyp keledi. Bul olardyń jańa býyn retinde qoǵamǵa oń ózgerister engizýge nıetti ekenin kórsetedi.
Biraq jastardyń aldynda turǵan qıyndyqtar da joq emes. Olar jahandaný men mádenı almasýdyń áserinen óz ulttyq erekshelikterin joǵaltyp alý qaýpimen betpe-bet keledi. Jastar arasynda rýhanı jáne mádenı qundylyqtardy nasıhattap, olardy saqtap qalý úshin otbasy, mektep jáne qoǵam birlesip jumys isteýi qajet.
Jalpy, qazirgi jastar – álemniń jańa beınesi, jańa múmkindikter men ózgeristerdiń bastaýy. Olar óz ustanymdary men áreketteri arqyly bolashaqtyń qandaı bolatynyn anyqtaıtyn býyn. Qoǵam olarǵa qoldaý kórsetip, baǵyt-baǵdar berip otyrsa, jastar almaıtyn qamal bolmaıdy dep bilemin.