Saıası naýqannan qalys qalmaı, tańdaýyn jasaýǵa kelgenderdiń qatarynda sportshylarymyz da bar. Almaty qalasy máslıhatynyń depýtaty, «Qazaqstan 100 jańa esim» jobasynyń jeńimpazy, paralımpıadashy Serik Esmatov №85 mektepte ornalasqan №447 saılaý ýchaskesine kelip, referendýmǵa daýys berdi.
– Búgin elimizde tarıhı oqıǵa – Respýblıkalyq referendým ótip jatyr. Biz úshin bul óz ustanymymyzdy bildirý men azamattyq paryzymyzdy oryndaý tásili. Tańerteńnen bastap men ózimniń Túrksib aýdanyndaǵy saılaý ýchaskemde júrmin. Táýelsiz Qazaqstannyń damýy respýblıkamyzdyń belsendi azamattarynan bastaý alatyny belgili. Mine, sonyń dáleli bolsa kerek, aýdan turǵyndary saıası naýqannyń mańyzdylyǵyn shyn sezinip, óz tańdaýlaryn jasap jatyr. Ásirese jastar jaǵy óte belsendi. Jastar – qoǵamnyń qozǵaýshy kúshi ǵana emes, eldiń tiregi, memlekettiń eń belsendi bóligi. Sondyqtan men jastardyń ókili jáne máslıhat depýtaty retinde tańdaýymdy jasap, referendýmda óz daýysymdy berdim. Óz basym, saılaýshylardyń jaıdary kóńil-kúılerine qarap jarqyn bolashaqty sezine tústim.