Almaty qalasy boıynsha Qylmystyq-atqarý júıesi departamentine qarasty №11 mekemesiniń aýmaǵynda №2 kásiptik-tehnıkalyq mektebi jumys isteıdi. Bul bilim oshaǵynda sottalyp, jazasyn ótep jatqan jasóspirimder kásiptik bilim alady.
Iá, qazirgi kúni bas bostandyǵynan aıyrylǵan jastar osy mektep ǵımaratynda «Elektrdánekerleýshi», «Metal boıynsha tokar», «Mehanıkalyq jınaý jumystarynyń slesary» mamandyqtaryn meńgerip júr. №2 kásiptik-tehnıkalyq mektebi byltyrdan beri Almaty jolaýshylar kóligi jáne tehnologıalar kolejiniń quramyna kirdi.
№11 mekemesinde jazasyn ótep jatqan jasóspirimder joǵaryda atalǵan toptarda jarty jyl boıy, ár aptanyń alty kúninde oqıdy. Bir kúndik sabaqtarynyń uzaqtyǵy – úsh saǵat. Óndiristik tájirıbe kásiptik-tehnıkalyq mekteptiń sehtarynda ótedi. Tájirıbe aıaqtalyp, emtıhandar tapsyrylǵan soń, sottalǵan balalarǵa memlekettik úlgide mamandyǵyn meńgergeni týraly kýálik beriledi.
– Barshamyzǵa belgili, bıyl – Jumysshy mamandyqtar jyly. Bizdiń túzeý mekemesinde tárbıelenip jatqan jasóspirimder bas bostandyǵynan aıyrylǵanymen, bilim alý quqyǵynan aıyrylǵan joq. Olar da barlyq ıgilikti ıgerýge quqyly. Búgin biz «Mehanıkalyq-qurastyrý jumystarynyń slesary» boıynsha bilim alǵan jeti jazasyn óteýshi jasóspirimge sertıfıkat tabystadyq. Ádette sotty bolǵan adamnyń bostandyqqa shyqqan soń qoǵamǵa beıimdelýi qıyn. Al bizden bilim alǵan jastar osy kásiptik kýálikteriniń arqasynda erteń jumysqa ornalasyp, qoǵamǵa sátti kirige alady dep senemin, – deıdi №11 mekeme bastyǵy, ádilet podpolkovnıgi A.Súleımenov.
Mamandyq ıelengen jasóspirimderdiń qýanyshyna ortaqtasýǵa kelgen Almaty jolaýshylar kóligi jáne tehnologıalar kolejiniń dırektory S.Súleımenovtiń aıtýynsha, kúz aıynan bastap jazasyn óteýshi jasóspirimderge stıpendıa taǵaıyndalady. Demek, olar kolej stýdentteri sıaqty teń dárejede bilim alyp, bolashaqta dıplom ıelenedi.