Almatyda 1200-den astam jumysshy men 573 birlik tehnıka qar tazalaýǵa jumyldyryldy.
Almatyda «Qazgıdromet» derekterine sáıkes, bir táýlikte 18 sm qar jaýdy, bul qańtardaǵy normanyń 31%-yn quraıdy. Kamenskoe platodaǵy qar qalyńdyǵy – 21 sm, al Medeýde – 12 sm.
Túngi ýaqytta kóshelerdi tazalaý úshin 573 arnaıy tehnıka men 711 jol jumysshysy jumyldyryldy. Qardy syrtqa shyǵarýǵa 203 samosval tartyldy. 23 qańtar kúni tańerteń 9600 tekshe metr qar syrtqa shyǵaryldy.
22 qańtardyń keshinen bastap, 26 tehnıka kolonnasy jol polısıasynyń patrúldik mashınalarymen birge qar kúreý jumystaryn júrgizdi. Qalyń qar 23:30-da bastaldy, sodan keıin qardy qaıta tazalaý jumystary tańǵy 4:00-de uıymdastyryldy.
Kúndizgi ýaqytta 475 birlik arnaıy tehnıka men 1280 jol jumysshysy jumyldyryldy. Shaǵyn kólemdi tehnıkanyń 95 birligin paıdalanyp, trotýarlardy, qoǵamdyq keńistikterdi jáne áleýmettik mańyzy bar obektilerge kireberisterdi mehanıkalandyrylǵan tazalaý júrgizildi. Sondaı-aq, qoǵamdyq kólik aıaldamalary men jer ústi ótkelderin qolmen tazalaý jumystary da atqarylýda.
Aýdan ákimdikterinde qar tazalaý jumystaryn baqylaý boıynsha táýlik boıy kezekshilik uıymdastyryldy.
Almatyda 22 qańtarda tańerteń qar jaýa bastady. «Qazgıdromet» RMK boljamy boıynsha, 23 qańtarda saǵat 16:00-den bastap táýliktiń sońyna deıin qar jaýady dep kútilýde. Aýa temperatýrasy kúndiz -5...-7°S, al 24 qańtarda jaýyn-shashynsyz bultty aýa raıy kútiledi. Túnde aýa temperatýrasy -18...-20°S-qa, kúndiz -12...-14°S-qa deıin tómendeıdi.