Adam papılloma vırýsyna (APV) qarsy egý densaýlyq saqtaý salasyndaǵy, ásirese jasóspirim qyzdar úshin barǵan saıyn ózekti taqyryp bolyp keledi. APV jatyr moıny obyry men basqa da qaterli isiktiń negizgi sebebiniń biri. Sondyqtan bul vırýstyń aldyn alý óte mańyzdy, deıdi Almaty №36 qalalyq emhananyń dárigeri Qarlyǵash Qalıeva.
Dáriger egýdiń negizgi sebebin jatyr moıny obyrynyń aldyn alý dep sanaıdy, óıtkeni adam papılloma vırýsy osy aýrýdyń damýynyń negizgi qaýip faktory.
Jynystyq belsendilikke deıin atalǵan ekpeni egý vırýsty juqtyrý múmkindigin tolyǵymen joıady jáne, tıisinshe, qaterli isik aýrýynyń damý qaýpin azaıtady.
«Klınıkalyq zertteýler kórsetkendeı, adam APV tasymaldaýshysymen baılanysta bolmaǵan jaǵdaıda vaksına 91-100% tıimdi. Bul ekpeni densaýlyqty qorǵaýdaǵy mańyzdy qadamǵa aınaldyrady», - deıdi Qarlyǵash Qalıeva.
APV ekpesi qaýipsiz jáne jaqsy tózimdi. Yqtımal janama áserler ádette jeńil ári qysqa merzimdi. Vaksına urpaqty bolý fýnksıasyna áser etpeıtinin eskerý mańyzdy.
APV ekpesi mindetti kúntizbege engizilgen elderde jatyr moıny obyrynyń syrqattanýshylyq deńgeıi aıtarlyqtaı tómendedi. Bul atalǵan ekpe egý baǵdarlamasynyń joǵary tıimdiligin kórsetedi.
Esterińizge sala keteıik, Qazaqstanda 2024 jyldyń qyrkúıeginen bastap ata-ana kelisimimen 11 jastaǵy jasóspirim qyzdardy APV-ǵa qarsy vaksınasıalaý bastalady.
«2024 jyldyń qyrkúıeginde bastalatyn naýqan ata-ana men qalyń qaýymnyń qoldaýy men túsinýin talap etedi. Vaksınasıa jatyr moıny obyrynan bolatyn aýrýshańdyq pen ólim-jitimdi aıtarlyqtaı tómendetýi múmkin, bul bolashaqta atalǵan máseleni tolyǵymen joıý týraly aıtýǵa múmkindik beredi», - dep túıindedi dáriger.