Massachýset tehnologıalyq ınstıtýtynyń zertteýshileri keıbir jasandy zerde júıeleriniń adamdardy aldaýǵa daǵdylanǵanyn rastaıtyn zertteý nátıjesin jarıalady.
Pıter Park esimdi ǵalym jetekshilik etken zertteý toby bul jasandy zerde júıeleriniń oıynshylardy onlaın oıyndarda aldaı alatynyn nemese CAPTCHA-ny aınalyp ótý («men robot emespin» dep atalatyn tekserý satysynan óte alatynyn) sıaqty tapsyrmalardy oryndaı alatynyn anyqtady, dep habarlaıdy Almaty-akshamy.kz Islam.kz-ke silteme jasap.
Pıter Park eleýsiz bolyp kórinetin mundaı mysaldardyń shynaıy ómirde aýyr saldarǵa uryndyrýy múmkin ekenin eskertti. Bul baǵyttaǵy zertteýde Cicero jasandy zerde júıesi bastapqyda vırtýaldy dıplomatıa oıynynda ádil qarsylas retinde jobalanǵan. Pıter Parktiń aıtýynsha, atalmysh «aldaýdyń sheberine» aınalǵan. Taǵy bir mysal: kórý qabiletim nasharlady, dep jalǵan málimet bergen GPT-4s(GPT-4 - OpenAI jasaǵan mýltımodaldy úlken til úlgisi, GPT-tiń tórtinshi nusqasy. Ol 2023 jyldyń naýryz aıynda shyǵaryldy jáne ChatGPT Plus paıdalanýshylary qoldana alady) CAPTCHA-ny (júıeniń paıdalanýshysy adam nemese kompúter ekenin anyqtaý úshin qoldanylatyn kompúterlik test) aınalyp ótý úshin adamdardy jaldaǵan. Pıter Park AI-ny adal bolýǵa úıretý qajettigin atap kórsetedi. Ádettegi baǵdarlamalyq jasaqtamadan aıyrmashylyǵy - AI tereń oqytý júıeleriniń seleksıalyq ósirýge uqsas proses arqyly «damıdy». Jattyǵý kezinde olardyń minez-qulqyn boljaýǵa bolady, alaıda, keıin baqylaýdan shyǵyp ketý yqtımaldylyǵy joǵary.