«Bas redaktorlar klýby» men SDU University Quqyq jáne áleýmettik ǵylymdar fakúltetiniń «Jýrnalısıka» mektebiniń birlese uıymdastyrýymen «Jasandy ıntellekt jáne qazaq medıasynyń transformasıasy» atty dóńgelek ústel ótti. Jıynda jasandy ıntellektiniń qazaq medıa keńistigine yqpaly, jýrnalısıkanyń jańa formattary men aqparattyq qaýipsizdik máseleleri talqylandy.
QR Parlamenti Senatynyń depýtaty, «Bas redaktorlar klýby» QB prezıdenti Bıbigúl Jeksenbaı jasandy ıntellekttiń qazaq jýrnalısıkasyna ákeletin múmkindikteri men qaýipterine toqtaldy.
“Tehnologıalyq revolúsıanyń oń da, teris te áseri bar ekenin este ustap, oǵan daıyn bolý kerek. Jasandy ıntellekt ýaqyt únemdep, jumysty jeńildetkenimen qatar, avtorlyq huqyq, jalǵan aqparat, aqparattyq qaýipsizdik jaǵynan da qaterler týǵyzýy múmkin. Sondyqtan zańnamalyq retteý de bolýy kerek. Bıyl jyly Parlamentte Jasandy ıntellekt jónindegi arnaıy zań jobasyn qaraý josparda bar”,-dedi ol. Senatordyń aıtýynsha, JI óńirlik jýrnalısıka, basylymdardy jańa deńgeıge kóterý múmkindigi zor.
Óz kezeginde dóńgelek ústelge qatysqan ýnıversıtet rektory Álimjan Igenbaev ta jańa tehnologıanyń múmkindigin atap ótti. Sondaı-aq "Prezıdent jáne halyq" gazetiniń bas redaktory Marat Toqashbaev, «Bas redaktorlar klýby» QB vıse-prezıdenti Nurbol Tólebaev, medaısarapshy ári oqytýshy Esengúl Kápqyzy, Qaz365 saıtynyń bas redaktory Baýyrjan Karıpov jasandy ıntellekttiń damý barysy men ásire týraly sóz qozǵady.
«Jasandy ıntellekt – búgingi jýrnalısıkanyń ajyramas bóligine aınalýda. Bul tehnologıanyń múmkindikterin durys paıdalana bilý kásibı jýrnalısıkanyń damýyna jańa serpin beredi», – dedi «Alatau Aqparat» medıaholdınginiń bas dırektory Erjan Qalymbaıuly eki jyldan beri kontent óndirý úderisinde jasandy ıntellekti paıdalaný tájirıbesin bólisti.
Forýmda jasandy ıntellekttiń qazaq medıa keńistigine yqpaly, onyń jýrnalısıkadaǵy jańa múmkindikteri jan-jaqty talqylandy. Sıfrlyq medıadaǵy trendter men aqparattyq qaýipsizdik máseleleri de nazardan tys qalmady. Spıkerler jasandy ıntellekttiń jýrnalısıkaǵa ákelgen ózgeristerin, kontent óndirisindegi avtomattandyrý men medıanyń bolashaq formattaryn sóz etti.
Óz kezeginde jýrnalısıka mamandyǵynda bilim alyp jatqan stýdentter jasandy ıntellekt kómegimen ázirlengen jobalaryn kórsetti. Aldaǵy ýaqytta jasandy ıntellekt «Jýrnalısıka» mekbetinde arnaıy pán retinde oqý júıesine engizilmek.
Sonymen qatar, stýdentter men medıa mamandary arasynda ashyq pikirtalas ótip, jas jýrnalıser ózderin qyzyqtyrǵan suraqtaryn qoıdy. Aqparattyq manıpýlásıa, faktchekıng, etıka jáne jasandy ıntellekttiń medıadaǵy orny sıaqty taqyryptar talqylanyp, sarapshylar óz tájirıbelerimen bólisti.
Forým qorytyndysy boıynsha qatysýshylar jasandy ıntellekttiń qazaq medıasynyń damýyna yqpaly úlken ekenin, biraq ony tıimdi ári jaýapkershilikpen paıdalaný qajet ekenin atap ótti. Bul jıyn medıa salasyndaǵy mamandar men jas jýrnalıser arasyndaǵy dıalogtyń mańyzdy ekenin jáne osyndaı kezdesýlerdiń sala damýyna yqpal etetinin kórsetti.
İs-shara stýdentterge tájirıbeli jýrnalıserden úırenýge, medıa salasyndaǵy jańa tehnologıalardy zertteýge jáne bolashaqtaǵy kásibı baǵyttaryn anyqtaýǵa múmkindik berdi.