Almatylyq kardıologtar jasandy ıntellekt kómegimen júrektiń últradybystyq zertteýin júrgizýdi meńgerdi
Almaty Qalalyq kardıologıa ortalyǵynda ozyq dıagnostıka jáne emdeý ádisteriniń negizderi sheńberinde «POCUS tujyrymdamasy: klınıkalyq tájirıbede qoldaný jáne mobıldi últradybystyq dıagnostıkada jasandy ıntellekti qoldanýdyń artyqshylyǵy» taqyrybynda sheberlik synyby ótti.
İs-sharaǵa arnaıy shaqyrylǵan sheteldik dáriger Hatem Soliman Aboumarie (Royal Brompton and Harefield Hospitals, London, UK) qatysty.
Jyl ótken saıyn jasandy ıntellekt ómirdiń ár túrli salasynyń ajyramas bóligine aınalyp keledi. Medısına salasy da shette qalǵan joq.
POCUS (Point-of-Care Ultrasound) tujyrymdamasy dárigerler naýqasty tekserý kezinde-aq, qosymsha últradybystyq dıagnostıkalyq prosedýraǵa joldamasyz, ózderi últradybystyq zertteý júrgizetin tásildi bildiredi. Mundaı tásil emdelýshiniń jaǵdaıyn yńǵaıly jáne jyldam baǵalaýǵa múmkindik beredi. Demek dıagnostıka ýaqyty qysqartylyp, dereý emdeýdi bastaý múmkin bolady.
"Bul tujyrymdamany klınıkalyq tájirıbede qoldaný birqatar aıqyn artyqshylyqqa ıe. Birinshiden, ol joǵary sapaly dıagnostıkanyń qoljetimdiligin jaqsartady ári medısınalyq qate yqtımaldyǵyn azaıtady. Dárigerler palatada, jedel járdemde ne shuǵyl kómek kórsetý bólimderinde naýqasqa últradybystyq zertteýdi birden tez ári tıimdi túrde júrgizip, naýqas ómirin saqtap qala alady", - deıdi Qalalyq kardıologıalyq ortalyq dırektory Roza Qýanyshbekova.
Sonymen qatar, mobıldi últradybystyq dıagnostıkada jasandy ıntellekti paıdalanýdyń artyqshylyǵy últradybystyq zertteý arqyly jınalǵan úlken kólemdegi derekti óńdeý jáne taldaý kontekstinde aıqyn bolady. Mashınalyq oqytý jáne jasandy ıntellekt algorıtmderi alynǵan keskinderdi taldaýdy avtomattandyrý, nátıjelerdi ınterpretasıalaý prosesin jeńildetý jáne dıagnostıkalyq dáldikti arttyrýǵa múmkindik beredi.
Jasandy ıntellekti paıdalaný últradybystyq dıagnostıkany ár túrli mobıldi qurylǵylar men qosymshalarǵa biriktirýdi jeńildetedi.
«Iaǵnı, dıagnostıkalyq jáne emdeý prosesine qatysýshylar - basqa mamandyq dárigerleri, máselen, emdeýshi dáriger, ne medbıkeler - últradybystyq zertteýdi paıdalana alady jáne júrgize alady. Mundaı sezbekter qurylǵynyń shaǵyn ólshemi men salmaǵyna baılanysty tótenshe jaǵdaı medısınasynda keńinen qoldanylady. Vızýaldy aqparatty smartfonǵa symsyz tasymaldaýdy paıdalaný, standartty últradybystyq apparatqa qaraǵanda tómen quny olardy tótenshe jaǵdaıda, sonyń ishinde tabıǵı jáne tehnogendik apat kezinde paıdalanýdy jeńildetedi. Óz kezeginde biz jaqyn arada bul tájirıbeni bizdiń Ortalyqta engizýdi josparlap otyrmyz», - deıdi Roza Qýanyshbekova.
Osylaısha, POCUS tujyrymdamasy mobıldi últradybystyq dıagnostıkada jasandy ıntellekti qoldanýmen birge naýqastyń jaǵdaıyn tez, dál jáne qoljetimdi dıagnostıkalaýǵa múmkindik beredi, bul saıyp kelgende emdeý nátıjesin jaqsartýǵa jáne medısınalyq kómek alý ýaqytyn qysqartýǵa septigin tıgizedi.
Jasandy ıntellektiń arqasynda aýrýdy dálirek anyqtaýǵa, onyń kezeńi men damýyn bilýge bolady.
Shara barysynda portatıvti últradybystyq dıagnostıkalyq júıeni qoldaný arqyly ár túrli júrek patologıasy bar naýqastar boıynsha dáris oqylyp, zertteýler júrgizildi.
Sheberlik sabaǵy qatysýshylardyń kásibı bilimin tolyqtyryp qana qoımaı, qalanyń medısına salasynyń damýyna zor úles qosty.