Oqý-aǵartý mınıstrligi men Freedom Holding Corp. bilim berý resýrstaryn damytý boıynsha yntymaqtastyq qarym-qatynas ornatý maqsatynda memorandýmǵa qol qoıdy, dep habarlaıdy vedomstvonyń baspasóz qyzmeti.
Bul qujat Memleket basshysynyń mektepke deıingi, orta, tehnıkalyq jáne kásibı bilim berý uıymdarynyń qajetti fýnksıonaldary engizilgen biryńǵaı onlaın bilim berý platformasyn ázirleý týraly tapsyrmasy aıasynda júzege asyrylýda.
Oqý-aǵartý vıse-mınıstri Araı Orazova atap ótkendeı, qazirgi ýaqytta bilim berýdiń barlyq deńgeıinde prosesterdi avtomattandyrýǵa múmkindik beretin biryńǵaı sıfrlyq ekojúıe qurý qajettiligi baıqalady. Bul maqsatqa jetý úshin mınıstrlik Freedom Holding Corp.-tiń qoldaýymen bilim berý ónimderiniń marketpleısin ázirleý jumystaryn júrgizýde. Munda jasandy ıntellekt quraldary arqyly árbir balanyń talantyn ashýǵa arnalǵan múmkindikter usynylady. Bul balalarǵa erte jastan bastap óz talanttaryn damytyp, mamandyq tańdaýǵa kómektesedi, elimizdiń adamı kapıtalyn damytýǵa jáne muǵalim, bala men ata-ana arasyndaǵy komýnıkasıany jaqsartýǵa múmkindik beredi.
Taraptar ulttyq biryńǵaı bilim berý platformasy arqyly árbir bilim alýshy úshin onlaın oqýdy qoljetimdi jáne sapaly etýdiń mańyzdylyǵyn talqylady. Sonymen qatar, bilim berý uıymdarynda platformany ilgeriletý men damytý, birlesken jobalardy júzege asyrý, steıkholderlermen semınarlar men konferensıalar ótkizý týraly kelisimge keldi.
Bul yntymaqtastyq bilim berý salasyndaǵy prosesterdi sıfrlandyrý arqyly oqýshylardyń bilim alý sapasyn arttyrýǵa, olardyń talanttaryn erte jastan damytýǵa jáne bilim berý uıymdarynyń jumysyn tıimdi etýge baǵyttalǵan.