Dástúr boıynsha mektep oqýshylary alańda saltanatty marshpen júrip ótti
Almatyda «Jas ulan» respýblıkalyq mektebiniń qyryq jyldyq mereıtoıyna arnalǵan saltanatty is-shara ótti, dep habarlaıdy Almaty-akshamy.kz.
Oǵan mektep túlekteri – Qorǵanys mınıstriniń orynbasary Ásker Beısenov, Aýmaqtyq qorǵanys departamentiniń bastyǵy, general-maıor Serik Borambaev, Qorǵanys mınıstrligi apparaty basshysynyń orynbasary, polkovnık Tólegen Bólejanov qatysty.
Shaqyrylǵan qonaqtardyń qatarynda Qarýly Kúshterdiń ardageri Halyq qaharmany, otstavkadaǵy general-leıtenant Baqytjan Ertaev, Áýezov aýdanynyń ákimi Abzal Egemberdıev, Baýyrjan Momyshulynyń kelini etnograf, jazýshy Zeınep Ahmetova da boldy.
– Bul mekteptiń tárbıelenýshileri memleketke qyzmet etýdiń ozyq dástúrin jáne óz Otanyna adal bolýdyń úlgisin kórsetip keledi. Olar árqashan shydamdylyqpen, tózimdilikpen, moraldyq jáne psıhologıalyq beriktikpen, kez kelgen qıyndyqty jeńe bilýmen erekshelenedi. Bul oqý ornynda memleketimizdiń jaýyngerlik daıyndyǵynyń irgetasy qalanýda, – dep atap ótti Baqytjan Ertaev.
Dástúr boıynsha mektep oqýshylary alańda saltanatty marshpen júrip ótti. Aty ańyzǵa aınalǵan qolbasshy Baýyrjan Momyshulynyń eskertkishine gúl shoqtary qoıyldy. Saltanatty rásimge qatysýshylar áskerı qaqtyǵystarda qaza tapqan mektep túlekteri: podpolkovnıkter Erlan Naýanovty, Qaırat Muhamadıevti jáne kapıtan Qaırat Qudabaevty bir mınýt únsizdikpen eske aldy.
Shara aıasynda merekelik konsert ótti. Saltanatty jıyn válspen aıaqtaldy.
"Jasulandyqtarmen" sándi kesh kóılekteri tal boıyna jarasqan Respýblıkalyq joǵary medısınalyq kolejdiń, Almaty oblystyq ınovasıalyq tehnologıalar kolejiniń, Qazaq bas sáýlet-qurylys akademıasynyń boıjetkenderi juptasyp bıledi.
Mereıtoıǵa oraı polkovnık Nurlyhan Erekeshovtyń qazaq tilinde "Jas ulan mektebine 40 jyl" kitaby jaryqqa shyqqanyn atap ótý mańyzdy. Basylym oqý ornyn qurýdyń bastaýynda turǵandardyń, sondaı-aq onyń túlekteriniń estelikterine arnalǵan.