Áskerı-dalalyq taktıkalyq oıyndar
Óńirlerde «Aıbyn» halyqaralyq áskerı-patrıottyq jastar jıynyna qatysý úshin irikteý týrlary ótip jatyr, dep habarlaıdy Almaty-akshamy.kz.
Jasóspirimder men oqýshylar 17-23 maýsym aralyǵynda Qaraǵandy oblysynyń «Spassk» oqý-jattyǵý ortalyǵynda jyl saıyn ótetin áskerı-patrıottyq jıynda óz klýbtarynyń namysyn qorǵaý úshin synalady.
Áskerı-sporttyq jáne áskerı-qoldanbaly sport túrleriniń jarystaryna dene shynyqtyrý jattyǵýlary, áskerılendirilgen estafeta, AK-74-ti tolyq emes bólshekteý jáne qurastyrý, pnevmatıkalyq myltyqtan atý, gaztumyldyryq pen jalpy áskerı qorǵanys jıyntyǵyn kıý normatıvterin oryndaý kiredi.
Jıyn barysynda «Aıbyn daryny» zıatkerlik jáne «Kúshimiz birlikte» áskerı-dalalyq taktıkalyq oıyndary, sondaı-aq «Aıbyn juldyzy» shyǵarmashylyq jáne «Smart Sarbaz – 2023» ónertapqyshtar baıqaýlary ótpek.
Qazirgi kezde jıynǵa jıyrma óńirden kelgen áskerı-patrıottyq klýbtar, onyń ishinde armıa generaly Saǵadat Nurmaǵambetov atyndaǵy QR Qorǵanys mınıstrligi áskerı kolejiniń, Shymkent pen Qaraǵandydan kelgen «Jas ulan» respýblıkalyq mektepteriniń, Semeı men Pavlodardan kelgen oblystyq áskerı mektep-ınternattardyń, Qarýly Kúshterdiń, basqa áskerler men áskerı quralymdardyń áskerı bólimderi men mekemeleri janynan qurylǵan áskerı-patrıottyq klýbtardyń tárbıelenýshileri qatysýǵa daıyndyq júrgizip jatyr. Ázirbaıjan men Ózbekstan komandalary da qatysady dep kútilýde.
«Aıbyn» jastar jıyny Qazaqstan áskeriniń ımıjin arttyrýǵa, áskerı-qoldanbaly jáne tehnıkalyq sport túrlerin tanymal etýge, áskerı qyzmet ótkerý kezinde qajetti daǵdylardy qazirden qalyptastyrýǵa yqpal etedi.