Memleket basshysynyń Joldaýyndaǵy áleýmettik-ekonomıkalyq basymdyqtardy talqylady
Senat Spıkeri Máýlen Áshimbaevtyń tóraǵalyǵymen Palata janyndaǵy Jas sarapshylar klýbynyń kezekti otyrysy ótti. Jıynda Memleket basshysy Qasym–Jomart Toqaevtyń Joldaýynyń áleýmettik-ekonomıkalyq basymdyqtary talqylandy.
Otyrysty ashqan Senat Tóraǵasy jeke kásipkerlik bastamalardy yntalandyrý, básekelestikti damytý, ulttyq tabysty ádil bólý jáne basqa da strategıalyq bastamalar jańa ekonomıkalyq saıasattyń basymdyqtary ekenin aıtty. «Baǵa belgileý isine memlekettiń aralasýynan birtindep bas tartý jáne ekonomıkany odan ári monopolıasyzdandyrý Joldaýda belgilengen birinshi kezektegi mindetter ekeni anyq. Sondaı-aq turaqty ekonomıkalyq ósýdi qamtamasyz etý úshin túsinikti jáne boljamdy ekonomıkalyq saıasat kerek. Prezıdentimiz qarjy sektoryn jandandyrý úshin jańa Salyq kodeksin ázirleýdi tapsyrdy. Búginde bul baǵytta tıisti jumystar bastalyp ta ketti. Sonymen qatar Memleket basshysy kedendik ákimshilendirý jáne búdjettik saıasat salalaryn jaqsartý boıynsha aıtarlyqtaı reforma júrgizý jáne naqty sharalar qabyldaý qajet ekenin aıtty», – dedi Máýlen Áshimbaev.
Jas sarapshylar Memleket basshysynyń Joldaýyndaǵy áleýmettik-ekonomıkalyq basymdyqtardy talqylap, olardy iske asyrýǵa arnalǵan usynystaryn ortaǵa saldy.
Senat Tóraǵasy Joldaýda memlekettik-jekemenshik seriktestiktiń jańa modelin engizý jáne nesıe resýrstarynyń tapshylyǵyn sheshý arqyly kásipkerlikti júıeli túrde qoldaýǵa erekshe nazar aýdarylǵanyn da atap ótti.
«Bizge qazir aldaǵy jyldarda Qazaqstanda kásipkerlerge jumys isteýge, óz kásibi men bıznesin júrgizýge múmkindik beretin naqty erejeler qajet. Bul – ádil, ashyq, demokratıalyq Qazaqstannyń jańa paradıgmasyn qalyptastyrýdyń alǵashqy qadamy. Joldaýdan týyndaıtyn ekinshi mindet – Ulttyq kompanıalar men kvazımemlekettik sektordy jáne ózge de tetikterdi reformalaý arqyly memlekettiń ekonomıkadaǵy úlesin azaıtý. Taǵy bir basymdyq, biz ekonomıkany belsendi túrde nesıeleý boıynsha maqsatty qadamdar jasaýymyz qajet. Prezıdentimiz basty erejelerdi atap ótti. Endi biz óz usynystarymyzdy berip, olardy negizgi qatysýshy taraptarǵa jetkizýimiz kerek. Sondaı-aq ári qaraı sol erejelerdi ustanýǵa tıispiz», – dedi Senat spıkeri.
İs-shara barysynda Jas sarapshylar klýbynyń músheleri salyq mólsherlemeleri men basqa da áleýmettik aýdarymdardyń halyqaralyq tájirıbesine, qazirgi sanksıalyq teketires jaǵdaıynda otandyq bıznestiń strategıasyna jáne ekonomıkalyq damýdyń basqa da mańyzdy máselelerine qatysty óz usynystary men usynymdaryn aıtty.