Alataý aýdanyndaǵy Oqýshylardyń ınovasıalyq shyǵarmashylyq ortalyǵynda "Patrıottyq rýh – basty qundylyq" taqyrybynda uıymdastyrylǵan esse jazý baıqaýynyń jeńimpazdary marapattaldy. İs-sharany respýblıkalyq "Janashyr" halyqaralyq qoǵamdyq qory Almaty qalasynyń Qoǵamdyq damý basqarmasynyń qoldaýymen ótkizdi.
Bul sharanyń basty maqsaty – oqýshylar arasynda patrıottyq qundylyqtardy nasıhattap, olardyń shyǵarmashylyq qabiletterin damytý jáne qoldaý.
– Konkýrsqa Almaty qalasynyń 40 mektebinen 200-den astam oqýshy qatysty. Baıqaýǵa 4-6 jáne 7-9-synyp oqýshylary óz jumystaryn usyndy. Qazylar alqasy olardyń shyǵarmalaryn muqıat saralap, úzdik esselerdi anyqtady. Jeltoqsan oqıǵasy, Táýelsizdik, Otan jáne patrıottyq sezim taqyryptaryna qalam terbegen oqýshylar baǵaly syılyqtarmen marapattaldy. İs-sharaǵa "Almaty aqshamy", "Ulan", "Drýjnye rebáta" basylymdarynyń ókilderi de qatysyp, bizge qoldaý kórsetti, – dedi joba jetekshisi, "Janashyr" halyqaralyq qoǵamdyq qorynyń tóraıymy Jańyl Ápetova.
Shyǵarmashyl oqýshylarǵa erekshe syı
Alatau-Aqparat medıaholdıngine qarasty "Almaty aqshamy" gazeti shyǵarmashyl órenderdi qoldaý maqsatynda arnaıy syılyq taǵaıyndady.
– Bizdiń gazet ujymy №99 mekteptiń 5-synyp oqýshysy Aıjan Jumadildániń essesin úzdik dep tanydy. Aıjan óz shyǵarmasynda atasy men ájesiniń tárbıesin negizge ala otyryp, patrıotızmdi úlkenderden alǵan ónegemen sheber ushtastyrǵan. "Otan – otbasynan bastalady" desek, bul esseden meıirimdilik, qamqorlyq, elge degen súıispenshilikke baǵyttalǵan tárbıeniń kórinisin baıqadyq. Osyndaı ortada ósken balanyń bolashaǵy jarqyn bolary sózsiz, – dep atap ótti syılyqty tabystaǵan "Almaty aqshamy" gazetiniń bólim redaktory, "Aqparat salasynyń úzdigi" Nurjamal Álisheva.
Bul baıqaý almatylyq oqýshylardyń patrıottyq rýhyn oıatyp, olardyń shyǵarmashylyq áleýetin arttyrýǵa serpin berdi. Elin, jerin súıetin urpaq tárbıeleý jolynda osyndaı sharalardyń mańyzy zor.