Túrkistan oblysynan kelgen 200-ge jýyq jas kóshbasshy Almatyda bas qosty.
Olar bir jyl boıy Jas Leader Akademiiasy pılottyq jobasy boıynsha óz mektepterinde bilim alyp, kóshbasshylyqtyń qyr syryn meńgergen bolatyn.
Úzdik shyqqandar 5 kún boıy forýmda sheberlikterin shyńdaıdy. Pılottyq jobaǵa Túrkistan oblysynyń tańdap alynýy beker emes. Aımaq respýblıkadaǵy mektep oqýshylarynyń sany boıynsha aldyńǵy qatarda. Onda jarty mıllıonnan astam bala turady, dep habarlaıdy Almaty-akshamy.kz 24.kz-ke silteme jasap.
Joba aıasynda 5-11 synyp aralyǵyndaǵy 12 000 mektep oqýshysy bir jyl boıy qatynas daǵdylary, kópshilik aldynda sóıleý, ýaqytty basqarý, toppen jumys jasaý, janjaldardy sheshý boıynsha fakúltatıvtik daıyndyqtan ótti.
«Biz trener bolyp oqýshylardy kóshbasshylyqqa daıyndadyq, bul óte bizdi shabyttandyrdy. Kóp jumys jasadyq, birlese jumys jasadyq. Oqýshylarymyzdyń bári qýanyshty bul jobaǵa qatysqanyna. Mine, nátıjesin kórsetý úshin Almaty qalasyna oqýshylardy ǵylymı jobalarmen úzdik kóshbasshylarymyzdy qosa alyp kelip otyrmyz», - dedi Atatúrik atyndaǵy №17 mektep-gımnazıanyń ustazy (Túrkistan qalasy) Rano Sýpabekova.
Almatydaǵy forýmǵa trenıń qorytyndysy boıynsha iriktelip alynǵan úzdik mektep oqýshylary men ustazdar kelgen. Olar túrli sheberlik sabaqtaryna qatysyp, damý satylaryn eńseredi. Sondaı-aq ártúrli salanyń kóshbasshylary balalarmen kezdesip, «jetistik qupıalarymen» bólisedi.
«Biz forýmda balanyń bilimin, keıbir daǵdylaryn keńeıtetin trenıńter ótkizemiz. Toptyq qarym-qatynas óneri, sondaı-aq medıa saýattylyq, qarjylyq saýattylyq, tanystyrý óneri sıaqty kóptegen sabaqtar bar», - dedi Jas leader akademiiasy jobalyq tobynyń jetekshisi Natalá Bahmýtova.
Bıyl kúzde Jas Leader Akademiiasy jobasy Jambyl jáne Qyzylorda oblystaryndaǵy 50 mektepte bastalady. Aldaǵy úsh jylda Batys Qazaqstan, Atyraý, Aqtóbe, Jetisý jáne Almaty oblystaryndaǵy mektepterdi qamtý josparlanýda.