Bolashaq Otan qorǵaýshylar – elimizdiń óskeleń urpaqtaryn patrıottyq rýhqa tárbıeleý úshin atqarylyp jatqan aýqymdy jumystar ushan-teńiz.
Atap aıtsaq, shekara aımaqtaryndaǵy mektepterde áskerı-patrıottyq klýbtar men áskerı synyptar ashyp, jas kadetterdiń bastapqy áskerı daıarlyqtaryn shyńdaýǵa kirisken shekarashylardyń bul eńbekteri esh ketpegenin aıtýymyz kerek.
Búginge deıin UQK Shekara qyzmeti Almaty oblysy boıynsha departamentiniń janynan ashylǵan «Jas shekarashy» áskerı-patrıottyq klýbynyń kadetteri respýblıkalyq, halyqaralyq deńgeıdegi saıystarǵa qatysyp, júldesiz oralǵan kúnderi joq. Budan bólek, Baqytjan Perimbetov basqaratyn klýbtyń kadetteri departament aıasynda ótetin sharalarǵa belsene atsalysqandary, olardyń taýǵa jasaǵan joryqtary jaıynda vedimistik gazet betinde az jazylǵan joq. Endi mine, osynaý alǵashqy qarlyǵashtardyń klýbyn jańa áskerı synyp tolyqtyrǵan...
Bul – Qarasaı aýdany boıynsha shekara basqarmasynyń ýchaskesindegi Qyrǵaýyldy aýylynyń K. Ýshınskıı atyndaǵy orta mektebinde ashylǵan «Jas sarbaz» áskerı-patrıottyq synyby. Departament bastyǵy polkovnık Á. Kaıýpovtyń tikeleı qoldaýymen, qyrkúıektiń basynda alqyzyl lentasy qıylǵan sý jańa synyptyń 20-dan astam oqýshysy búgin mańyzdy oqıǵanyń kýásine aınaldy. Óıtkeni, osy sátten bastap, olar tolyqqandy kadetke aınalatyn bolady.
...Atalǵan bilim oshaǵynyń basshysy S. Aıtýlova bastap kelgen 8 «B» synybynyń kadetterin ústerine kıgen formalary erekshelendirip tur edi. Degenmen, olardy «kadet» dep ataýǵa áli erte. Qazir shekara bólimshesi bastyǵynyń tárbıe jáne ıdeologıalyq jumystary jónindegi orynbasary aǵa leıtenant A. Turarov bastaǵan shekarashylardyń aldynda «Kadetter antyn» qabyldaıdy. Ári qaraı, ofıser olardy osy sátten bastap, kadet bolǵanyn aıǵaqtaıtyn arnaıy sertıfıkat tabystaıdy.
Aıtý kerek, bizdiń aldymyzda kózdi ashyp-jumǵansha kadetke aınalyp shyǵa kelgen balalardyń baqyttan bal-bul janǵan júzderin kórý bir ǵanıbet boldy. Ózderiniń de búgingi sharaǵa ábden daıyndalǵany, olardyń áskerılerge barynsha uqsaýǵa tyrysqan qımyl-qozǵalystarynan baıqalyp tur.
Taǵy bir qýanarlyǵy, búgin 10 synyptyń 5 oqýshysy departament basshysynyń atyna áskerı joǵary bilim oshaqtaryna oqýǵa túskisi keletinderi týraly ótinish qaldyrdy. Ári qaraı, olardyń qujattaryn daıyndaýmen departamenttiń laýazymdy tulǵalary aınalysady...
Osylaısha, «Erlik sabaǵynyń» ashylýymen ant qabyldaý rásimi aıaqtalyp, kadetter sarbaz aǵalarymen birge estelik sýretke túsken soń bólimsheniń ómirimen tanysýǵa kiristi. Aldymen, bólimsheniń jelkesinde turǵan shekaralyq baqylaý munarasyna kóterilip, aınalaǵa dúrbimen sholý jasap, ózderin naǵyz shekarashy sezingen kadetter ári qaraı iz zerdeleıtin qalashyqqa bardy. Munda aǵa leıtenant Arman Turarov olarǵa shekara buzýshynyń izin tabý úshin ne isteıtinderin qyzyqty etip áńgimelegen.
Balalardy shekarashylardyń el shebindegi senimdi kómekshileri – qyzmettik ıtter de óz tilderinde «qýana» qarsy alǵan. Bir qyzyǵy, jaı kezderi azamattyq kıimdegi adamdardy kóre salyp, aınalasyn azan-qazanǵa toltyryp shyǵa keletin ıtter bizdiń jas dostarymyzdyń aldynda momaqan bola qalǵan. Sóıtsek, qyzmettik ıtterdi «tynyshtandyrǵan» balaqaılardyń ústindegi forma kórinedi... Itpisiń degen!
Sóıtip, qazaq-qyrǵyz shekarasyn kózderiniń qarashyǵyndaı kúzetip júrgen qaskeleńdik shekarashylardyń tynys-tirshiligimen tanysyp, erekshe áserge bólengen «Jas sarbaz» áskerı-patrıottyq synybynyń kadetteri shara sońynda qaıtadan sapqa turdy. Sosyn bilim oshaǵynyń basshysy Sapýra Álimhanqyzy ózderin qushaq jaıa qarsy alyp, tamasha kóńil-kúı syılaǵan shekarashylarǵa alǵys aıtyp, qyzmetterine sáttilik tiledi.
Aınalyp kelgende, osynyń barlyǵy qatarymyzdy jas patrıottardyń tolyqtyrǵanyn bildiretin...