Meniń qarsy aldymda 450-deı sarbaz sap túzep turdy. Bul – UQK Shekara qyzmeti Almaty oblysy boıynsha departamentine qarasty Qarasaı aýdany shekara basqarmasynyń Aqjardaǵy tehnıkalyq jáne kásibı daıarlyq bólimindegi kórinis. Qarbalas. Óıtkeni, shekarashylar sapyna alynǵan sarbazdar bólimniń ortalyq alańynda sappen júrýdiń qyrlary men syrlaryn úırenýge kirisip ketken edi.
«Biz janbasaq, lapyldap!..» Osyndaıda, árbir óleńi ot bolyp keletin Maǵjan Jumabaevtyń jastary eriksiz eske túsedi. Al myna alańdaǵy sarbazdar she? Lapyldap janýǵa daıyn ba? Sóıtsek, daıyn eken. Tipti, shekaraǵa tap bolyp, shekarashy ataný úshin ózderine qoıylatyn talaptardyń údesinen shyqqandar jetkilikti kórinedi. Munda, taǵy, baýyrjanshylar mektebiniń túlegi de bar. Qýanarlyǵy sol, keshegi kadet óziniń áskerı mektepten alǵan bilimin ózi sekildi jas sarbazdarǵa úıretýge belsene kirisip ketipti. Bizdi tánti etken de jas jigittiń osy qadamy edi. Osynyń ózi bólek maqalaǵa suranyp turǵandyqtan, qatardaǵy jaýynger Jantemir Jaqsylyq týraly bólek qalam terbeýdi sheshtik.
Saptyq alań. Munda ásker qataryna burynyraq alynǵany bar, keıinirek kelgeni bar, barlyǵy saptyq daıyndyqqa qatysty jattyǵýlardy oryndap jatyr. Qımyldary ár túrli. Komandıri «Ońǵa» dese, solǵa burylǵan sarbazdardy kórip, basymyzdy eriksiz shaıqadyq...
Desek te, bul ýaqytsha kórinis ekenin bilemiz. Dál qazir alańda turǵan sarbazdar endi bir aıdan keıin múlde tanymastaı bolyp ózgeretinine, buıryqsyz qozǵalmaıtyn naǵyz shekarashyǵa aınalatynyna senimimiz kámil.
Alty nemese toǵyz aıdan keıin olardyń arasynan sýyrylyp shyǵyp, kelisimsharttyq áskerı qyzmetshi, otandyq nemese sheteldik áskerı joǵary oqý oryndarynyń kýrsanty bolyp shyǵatyndary da ǵajap emes.
Tek, muny ýaqyt kórsetedi. Al qazir olar da: «bilsem, kórsem, úırensem» degen jalǵyz-aq tilek bar.
Bul týraly Qarasaı aýdany boıynsha shekara basqarmasy bastyǵynyń orynbasary – bólim bastyǵy podpolkovnık Saǵadat Áýezov bizge bergen suhbatynda bylaı deıdi:
– Búginge deıin biz 500-ge jýyq áskerge shaqyrylýshyny qarsy alyp, ábden úırenshikti bolǵan mindetimizge kirisip kettik. Jigitterdiń arasynda sportshy, joǵary nemese arnaıy orta bilimdiler az emes. Aqyl toqtatqan, sabyrly. Úıretken nárseni tez qaǵyp alýǵa tyrysyp turady. Biz de óz kezeginde olarmen áńgime ótkizip, azamattyq boryshtaryn ótegen soń ózderine beriletin múmkindikter týraly aıtyp, joldaryn túsindirýge tyrysamyz. Kúni keshe ǵana departament bastyǵynyń orynbasary polkovnık A. Munalbaev osynda kelip, sarbazdarmen áńgimelesti. Áskerı ómirdiń qatal tártibin túsindirdi. Oqýǵa túsýge shaqyrdy. Qala berdi, shekara basqarmasynyń áıelder keńesi de bizge jıi kelip, jeke qurammen jeke jumys isteýde.
Osylaısha, jyldaǵy dástúrmen, «bir jeńnen bas, bir jaǵadan qol shyǵarsaq», utylmasymyz anyq.
Iá, sardar durys aıtyp tur edi. Naǵyz áskerı orta jas sarbazdarǵa qushaǵyn ashty. Endigi mindet aıqyn. «Kúz-2024» shaqyrylymy daıyndyqtan ótip, shekarashylyq sheberlikterin shyńdaǵan soń bir-bir mamandyq ıeleri atanyp, shekaraǵa attanady. Bul úshin olar bárine shydaýǵa bar!