Almatylyqtar búgin Shańyraq kúnin atap ótip jatyr. Al kez-kelgen shańyraqtyń sáni, máni, bazary – bala. Almatynyń №4 qalalyq perzenthanasynyń ujymy búgin bosanǵan on anaǵa jáne qundaqtaýly nárestelerine «Naýryz-bazarlyq» usyndy. On náresteniń tórteýi ul, altaýy qyz.
– Bala – adam ómirindegi eń úlken baqyt qoı. Bul meniń ekinshi sábıim. Tuńǵyshymyz - qyz, ol búldirshinimdi de osy perzenthanada bosanǵanmyn. Tórt jyldan soń, mine, ul súıdik. Shańyraǵymyzdy qýanyshqa keneltip, kóktem-kóńil syılaǵan bóbegimiz eldiń azamaty bolsyn deımin. Perzenthana ujymyna alǵys aıtamyn. Meniń balam da bolashaqta qoly ashyq, jomart, el-jurtqa qaraılasyp júretin qaıyrymdy bolsyn degen analyq tilegim bar, – deıdi qol-aıaǵyn aman-esen baýyryna alǵan almatylyq Araılym Tókesheva.
Tátti uıqyda jatqan bóbegin qushaqtap otyrǵan baqytty analarǵa perzenthananyń bas akýsheri Sáýle Sovetqyzy izgi lebizin jetkizip, shańyraq shattyǵyn tiledi.
Analarǵa án-jyrdan shashý shashyldy.
Byltyr №4 qalalyq perzenthanada 5136 bala dúnıege kelgen bolatyn. Al osy jyldyń basynan beri 930 sábı ómir esigin ashty.
Taqyrypqa oraı búgingi kúnniń mán-maǵynasyn aıta ketsek. Elimizde Naýryz meıramyn toılatýdyń jańa jalpyulttyq tujyrymdamasy bekitilip, «Naýryznama» onkúndigi jarıalanǵan bolatyn. Búgingi 17 naýryzdaǵy is-sharalar tizbegine «Shańyraq» ataýy berilip otyr. Bul kúni otbasy qundylyqtary dáriptelýde.