Almatyda 28 gvardıalyq-panfılovshylar atyndaǵy saıabaqta áskerı orkestrdiń súıemeldeýimen jas býyndy áskerge saltanatty túrde shyǵaryp saldy.
İs-sharaǵa Almaty garnızonynyń áskerı qyzmetshileri, áskerı-tehnıkalyq mekteptiń, «Jas sarbaz» áskerı-patrıottyq qozǵalysynyń tárbıelenýshileri, Qarýly kúshterdiń ardagerleri, áskerge shaqyrylýshylardyń týǵan-týystary qatysty.
– Qazirgi ýaqytta biz Shekara qyzmetiniń bólimshelerin jasaqtadyq. Endi Qarýly kúshterdi jasaqtaý bastaldy. Bul qorǵanys vedomstvosynyń áskerı bólimderine jóneltiletin alǵashqy lek, – dedi Almaty qalasy qorǵanys isteri jónindegi departamentiniń bastyǵy polkovnık Talǵat Ózehan.
Áskerge shaqyrylýshylar Desanttyq-shabýyldaý áskerlerine boryshyn óteýge attanady. Ásker qataryna alynǵandarǵa Qarýly kúshterdiń ardagerleri men ata-analary óz tilekterin bildirdi.
– Ulyma senemin. Jaýapkershiligi mol. Ózine bala kezinen áskerı mamandyq unaıtyn, sondyqtan onyń kóńil-kúıi de jaqsy, – dedi áskerge shaqyrylýshynyń anasy Gúlshat Melkova.
Esterińizge sala ketsek, kúzgi naýqan barysynda Almatydan myńnan astam azamat áskerge shaqyrylady. Jastar Qarýly kúshterdiń áskerı bólimderinde, UQK Shekara qyzmetinde, Memlekettik kúzet qyzmetinde jáne Ulttyq ulanda qyzmet ótkeretin bolady.