Almatyda bolashaq mamandarǵa arnalǵan vorkshop ótti
Almaty qalasyndaǵy «Arhıtektýra, dızaın jáne ınjenerıa» kolejinde JapJaryk kompanıasynyń uıymdastyrýymen «Svet pod kontrolem» dep atalatyn vorkshop ótti. Bul is-shara stýdentterge elektr qalqandary men jaryqtandyrý júıelerin qurastyrý boıynsha praktıkalyq daǵdylardy úıretýge baǵyttaldy. Kolej shańyraǵynda ótken sharaǵa stýdentter, oqytýshylar, jáne sala mamandary qatysty.
Vorkshopta JapJaryk kompanıasynyń mamandary zamanaýı jaryqtandyrý jáne elektrotehnıka salasyndaǵy ınovasıalyq sheshimderdi tanystyryp, stýdentterge tájirıbelik sabaqtar ótkizdi. Óz kezeginde stýdentter elektr syzbalaryn oqý, montajdyq jáne prınsıpıaldy sqemalardy taldaý, kabeldik trassalardy júrgizý jáne taratýshy elektr qalqandaryn ornatý boıynsha daǵdylardy meńgerdi. Sonymen qatar, jaryqtandyrý júıelerin ornatý, baptaý, aqaýlardy anyqtaý jáne joıý boıynsha da qajetti tájirıbe alyndy.
İs-shara barysynda Almaty qalasynyń «Arhıtektýra, dızaın jáne ınjenerıa» kolejiniń dırektory Kamal Jamanǵozov kolejdiń tehnıkalyq bilim berý salasyndaǵy mańyzdylyǵyn atap ótti. Onyń aıtýynsha, kolej dýaldy oqytý júıesin engizý arqyly stýdentterge teorıamen qatar praktıkalyq daǵdylardy úıretýdi qamtamasyz etedi.
«Biz qazirgi zamanǵy eńbek naryǵyna qajetti bilikti mamandardy daıarlaımyz. Memleket basshysynyń 2025 jyldy Jumysshy kásipteri jyly dep jarıalaýy – osy salaǵa degen suranystyń artqanyn bildiredi. Biz bul bastamany qoldaımyz jáne júzege asyrýǵa daıynbyz», – dedi kolej dırektory.
Bul vorkshop Almatydaǵy tehnıkalyq bilim men óndiristiń baılanysyn nyǵaıtýǵa baǵyttalǵan. Qatysýshylar teorıalyq bilimderin tájirıbemen ushtastyryp, bolashaqta naryqta suranysqa ıe maman bolýǵa úlken qadam jasaıdy. Jumysshy mamandyqtarynyń bedelin kóterý úshin mundaı bastamalar aldaǵy ýaqytta da jalǵasady deıdi uıymdastyrýshylar.
· Taqyrypqa oraı
Nurǵalı MÝSIRMANKÝLOV, JapJaryk kompanıasynyń jetekshisi:
Bilim sapasyn kóterýdi kózdedik
Qazaqstanda elektromontaj salasyna baǵyttalǵan keshendi oqý orny joq. Sondyqtan biz osy salany damytý úshin jańa oqytý júıesin qalyptastyryp, kolejben birlesip arnaıy kabınet ashtyq. Stýdentterge teorıany vızýaldy túrde kórý jáne tájirıbede oryndaý múmkindigin berý arqyly biz olardyń shynaıy qurylys nysandarynda tájirıbe alýy úshin jaǵdaı jasadyq.
Álıhan ÁBDİQALYQ, Elektromontaj fakúltetiniń 1-kýrs stýdenti:
Bilikti maman bolýǵa úlken múmkindik beredi
Men bala kezimnen Nıkola Tesla sıaqty danyshpandardyń ómiri men eńbekterine qyzyǵyp óstim. Bul salaǵa degen qushtarlyǵym meni elektr energetıkasy mamandyǵyn tańdaýǵa jeteledi. Mektepti bitirgennen keıin osy mamandyqqa degen qyzyǵýshylyǵym tek arta tústi jáne men ata-anamnyń qoldaýymen osy joldy tańdap, bilim alýǵa qadam bastym. Kolejdegi oqytýshylarymyz osy mamandyqtyń tereńdigin túsindirip, meniń qyzyǵýshylyǵymdy arttyryp keledi. Olardyń sabyrly ári túsinikti tásili meni osy salada jetistikke jetýge degen senimimdi nyǵaıtady.