Berlınniń basty tarıhı oryndary men sáýlet nysandary kózdiń jaýyn alatyndaı ásem kúıge endi.
Óıtkeni qazir shaharda dástúrli jaryq festıvali ótip jatyr. Álemniń túkpir-túkpirinen jınalǵan sheberler qaladaǵy qamaldar men úkimet úıleriniń qasbetin shammen bezendirip, 3 D kartınalarmen kómkergen, - dep habarlaıdy almaty-akshamy.kz 24.kz arnasyna silteme jasap.
Bul kúnderi Berlın adam tanymastaı ózgerdi. Ádette surǵylt bolyp turatyn ǵımarattardyń qabyrǵasy jarqyrap, jaınap shyǵa kelgen. Sharlottenbýrg qamaly, Berlın munarasy syndy kórneki oryndardyń bárinen 3D kartınalaryn kórýge bolady.
"Maǵan Gýmboldt ýnıversıtetiniń janyndaǵy ınstallásıa qatty unady. Budan basqa dızaınerler búkil alańdy bezendirip tastaǵan. Qaı jerge qarasań da jarqyrap tur. Jalpy bul festıváldi jylda arnaıy kelip kóremin. Týrıser sany da kóbeıip keledi", - deıdi jergilikti turǵyn Krıstofer.
Brandenbýrg qaqpasynyń mańynda da erekshe músinder paıda boldy. Onda fransýz, bolgar, japon jáne ýkraınalyq sheberlerdiń týyndylary qoıylǵan.
"Berlınde jaryq festıvalin ótkizý - ǵalamat ıdeıa. Biz qalanyń 4 kórneki ornyndaǵy shoýlarǵa kózaıym boldyq. Ásirese Brandenbýrg qaqpasyndaǵy músinder qatty unady. Keremet. Buıyrsa, kelesi jyly da kelmekpiz", - deıdi ol.
Jalpy shaharda 42 jerde 85 shoý ótip jatyr. "Jaryq festıvali adamdarǵa keremet kóńil kúı syılap qana qoımaı, energıany únemdeýge de kómektesedi", - deıdi uıymdastyrýshylar. Óıtkeni munda tek dıodti shamdar ǵana qoldanylady. Tartymdy is-shara 10 kúnge sozylmaq.