Almatyda «Jarqyn kúz» atty kúzgi naýqan aıasynda keń kólemde tazalyq jumystary men aǵash otyrǵyzý sharalary ótýde. Bul ekologıalyq aksıa respýblıkalyq «Taza Qazaqstan» baǵdarlamasy aıasynda uıymdastyrylyp, ekologıalyq jaǵdaıdy jaqsartý jáne qalany jasyldandyrýdy maqsat etedi, dep habarlaıdy aqshamnews.kz.
Naýqan barysynda Almatynyń 8 aýdanynan 10 myńnan astam turǵyn tazalyq jumystaryna qatysyp, óz úıleriniń mańaıyna, kósheler men parkterge jańa aǵashtar men butalar otyrǵyzdy. Ár qatysýshyǵa otyrǵyzý úshin kóshetter usynyldy.
300-den astam tehnıka men 1755 komýnaldyq qyzmetkerler aksıaǵa jumyldyryldy. Jastar da belsendi qatysyp, mundaı sharalardyń uıymdastyrylýynyń mańyzdylyǵyn atap ótti.
«Almatynyń jarqyn kúzinde biz qalaǵa degen qamqorlyǵymyzdy kórsetemiz. Senbilikke qatysý arqyly biz tazalyqty qamtamasyz etemiz», - dedi Almaty qalasy jastar saıasatynyń memlekettik qorynyń dırektory Baǵdat Anarbaeva.
Balalar da bul sharadan tys qalmady, olar eresektermen birge qoqystardy jınap, aǵash otyrǵyzdy.
«Balalar senbilikke qatysa otyryp, jaýapkershilikti jáne týǵan qalaǵa degen súıispenshilikti boıyna sińiredi», - deıdi ata-analar.
Keń aýqymdy tazalyq jumystary barysynda demalys aımaqtary, parkter men skverler tazartylyp, shamamen 4 myń tekshe metr qoqys shyǵaryldy. 10 myńnan astam aǵash otyrǵyzyldy, onyń ishinde jańa ALA parkine 1200 kóshet otyrǵyzyldy.
Aksıa turǵyndar tarapynan úlken qoldaý tapty. Qazaqstannyń halyq ártisi Altynbek Korazbaev da aksıaǵa qatysyp, osyndaı sharalardyń qala ortada qolaıly jaǵdaı jasaýǵa baǵyttalǵan mańyzdy qadam ekenin atap ótti.
«Mundaı is-sharalar jastardyń týǵan qalaǵa jaýapkershiligin qalyptastyrady», - dedi ol.
Otyrǵyzý úshin qalada jaqsy ósetin aǵash sorttary tańdaldy: alma, qaraǵash, akasıa, úıeńki sekildi aǵashtar otyrǵyzyldy. Aksıa barysynda mádenı-saýyqtyrý baǵdarlamasy da uıymdastyryldy, turǵyndarǵa kóńildi ýaqyt ótkizýge múmkindik berdi.