Memleket basshysy Qasym-Jomart Toqaev Qazaqstan halqyna kezekti Joldaýyn jarıalady. Kemeldi, kókeıtesti máseleler kóterilip, jańa múmkindikterge jol ashatyn baǵdarlar naqtylandy. Prezıdent belgilep bergen mańyzdy mejelerge qol jetkizý – Qazaqstannyń qazirgiden de bıik asýlardy baǵyndyryp, qýatty memleketke aınalýyna zor múmkindik ashpaq. Elimizdiń búgingi tańdaǵy jetistikteri az emes. Táýelsiz Qazaq Elin tórtkúl dúnıe tanyp, moıyndady. Endigi jerde qajyrly eńbegimiz – Otanymyzdy álemdik aýqymdaǵy órisi keń, halyqaralyq arenada laıyqty bedelge ıe, órkendegen elge aınaldyrýǵa jumyldyrýǵa baǵyttalýy tıis.
Joldaýdaǵy iri basymdyqtardyń biri – Jańa Qazaqstannyń basty bes baǵyty: jańa ekonomıkalyq saıasat, ekonomıkanyń naqty sektoryn damytý, el bolashaǵyna arnalǵan strategıalyq ınvestısıa, memlekettik basqarý isin qaıta jańǵyrtý, zań men tártipke erekshe basymdyq berý.
Bul basymdyqtar – Jańa Qazaqstannyń bes tuǵyry. Joldaýda áleýmettik jáne ekonomıkalyq saıasattyń arasyndaǵy tepe-teńdik saqtalǵan. Mysaly, jeke bastamalar yntalandyrylady, «balyq berme, qarmaq ber» prınsıpi eskeriledi. Jastar kásipkerligin damytý úshin jeńildetilgen kredıt beriledi.
Jalpy, Prezıdent amanattaǵan tapsyrmalardyń salmaǵy joǵary. «Uly ister qıyn kezde týyndaıdy» degendeı, solardyń ishinde elimizge kiretin sý kózderiniń azaıýy, sýdyń 40%-nyń jerge sińip ketýi memleket úshin eń ózekti máselelerdiń birine aınalyp otyr dep oılaımyn.
Prezıdent Ádiletti Qazaqstandy birge qurýǵa, qasıetti Otanymyzdy birge órkendetýge shaqyrdy. «Uıymdasa bilgen – utady» deıdi halyq danalyǵy. Jańa Qazaqstan ultymyzdyń jarqyn bolashaǵy jolyndaǵy mańyzdy qadam bolmaq.