Densaýlyq saqtaý mınıstrligi Marbýrg vırýsynyń taralýyna baılanysty epıdemıologıalyq baqylaýdy kúsheıtti
QR Bas memlekettik sanıtarıalyq dárigeri Sarhat Beısenovanyń aıtýynsha, Densaýlyq saqtaý mınıstrligi Dúnıejúzilik densaýlyq saqtaý uıymynyń jańa qaýipti ınfeksıa — Marbýrg vırýsynyń órshýi týraly eskertýine baılanysty baqylaý sharalaryn kúsheıtýde.
Marbýrg vırýsy — adamdar men prımattarǵa áser etetin sırek kezdesetin, aýyr vırýstyq gemorragıalyq qyzba. Bul vırýs jarqanattarda kezdesip, olardan adamdarǵa berilýi múmkin.
Marbýrg qyzbasynyń tabıǵı oshaqtary
Bul aýrý Ońtústik, Batys jáne Ortalyq Afrıka elderinde, atap aıtqanda, Ońtústik Afrıka Respýblıkasy, Gabon, Sýdan, Kongo Demokratıalyq Respýblıkasy, Lıberıa, Gvıneıa, Zımbabve, Kenıada kezdesedi. Aýrýdyń belgileri vırýsty juqtyrǵannan keıin 2-21 kún ishinde paıda bolady.
Densaýlyq saqtaý mınıstrligi profılaktıka sharalaryn saqtaýdy usynady
Halyqtyń joǵary kóshi-qonyn eskere otyryp, Qazaqstan Densaýlyq saqtaý mınıstrligi qazaqstandyqtarǵa endemıalyq aımaqtarǵa barǵan kezde kelesi saqtyq sharalaryn oryndaýdy usynady:
1. Juqtyrǵan adamdarmen baılanysta bolýdan aýlaq bolý.
2. Afrıka jýnglıinde kezdesetin jabaıy janýarlardan saq bolý.
3. Jergilikti janýarlardyń nashar qýyrylǵan etin tutynbaý.
4. Vırýstyń asımptomatıkalyq tasymaldaýshysy bolyp tabylatyn mysyrlyq jarqanattar mekendeıtin úńgirler men shahtalarǵa barmaý.
5. Aýrý belgileri paıda bolǵan kezde dereý medısınalyq kómekke júginý.
6. Jeke gıgıena erejelerin qatań saqtaý.
Marbýrg vırýsy nege qaýipti?
Marbýrg vırýsyna qarsy arnaıy em nemese vaksına joq. Tek sımptomatıkalyq emdeý ǵana júrgiziledi.
Bul vırýs adamǵa tikeleı baılanys arqyly beriledi. Vırýsty zaqymdalǵan teri nemese shyryshty qabyq arqyly juqtyrýǵa bolady. Sondaı-aq vırýspen zaqymdalǵan zattarǵa tıgende, naýqastyń tósek-orny nemese kıimin ustaǵan kezde juqtyrý qaýpi bar.
Aýrýdyń negizgi belgileri: qyzba, tamaq aýrýy, bórtpe, ishtiń aýyrýy, muryn men kózden qan aǵý.
Marbýrg vırýsynyń taralý qaýpine baılanysty shekteý sharalary qabyldanady ma?
Sarhat Beısenova Densaýlyq saqtaý mınıstrligi Marbýrg vırýsynyń epıdemıologıalyq jaǵdaıyn muqıat qadaǵalaıtynyn atap ótti. Aýrýdyń respýblıkaǵa ákelinýine jáne taralýyna jol bermeý maqsatynda halyqaralyq áýejaılarda jáne memlekettik shekarada barlyq keletin jolaýshylardyń baılanyssyz termometrıasy júrgizilip, sanıtarıalyq-karantındik baqylaý júzege asyrylýda.