Meteorologıalyq agenttik sý tasý qaýpi bar ekenin eskertti.
«Nanmadol» taıfýny Japonıa arhıpelagy arqyly Tynyq muhıtyna qaraı jyljyp, seısenbi kúni ońtústik-batysta qatty jańbyr jaýyp, kóshkin týdyrǵannan keıin tómen qysymdy júıege deıin álsiredi.Tabıǵı apaty saldarynan eki adam qaza taýyp, bireýi iz-túzsiz joǵalyp ketti, 100-den astam adam jaraqat aldy, dep habarlaıdy Almaty-akshamy.kz QazAqparatqa silteme jasap.
Japon teńiziniń jaǵalaýynan ótkennen keıin, taıfýn seısenbi kúni tańerteń eldiń eń úlken basty araly Honsúdiń soltústik-shyǵys aımaǵynan jetti. Meteorologıalyq agenttik nóser jaýynann zardap shekken aımaqtarda endi kúshti jel turyp, sý tasý qaýpi bar ekenin eskertti.
Kúshti jel men nóser jańbyrǵa sebepshi bolǵan maýsymdaǵy 14-shi taıfýn jeksenbi kúni Kúsú aralynyń ońtústik-batys aımaǵyna jetkende, buryn-sońdy bolmaǵan daýyl turdy.
Mıadzakı prefektýrasynda kóshkinnen keıin taý baýraıyndaǵy qırap qalǵan úı ishinen bir er adamnyń denesi tabyldy, al aýylsharýashylyq alqaptarynda sý astynda qalǵan kólikten taǵy bir adamnyń denesi shyǵaryldy.
Prefektýra bıligi men tabıǵı apat saldaryn joıý agenttiginiń málimetinshe, Hırosımada bir adam iz-tússiz joǵalyp, keminde 115 adam jaraqat alǵan.
Kyushu Electric Power kompanıasy tańǵy 11-de 100 myńnan astam úı jaryqsyz qalǵanyn habarlaǵan.
Mıadzakı prefektýrasyndaǵy taýly aımaqta kóshkin júrip, kópir qıraǵany rastaldy, al Shıga prefektýrasynda mańyzdy mádenı qundylyq dep tanylǵan Hıkone saraıyndaǵy ǵımarattardyń bir bóligi zaqymdandy.
Seısenbide Japonıanyń meteorologıa agenttigi eldiń soltústik-shyǵysynda saǵatyna 108 shaqyrym jyldamdyqpen jel soǵady, al batysynda tolqynnyń bıiktigi 7 metrge jetetinin boljaıdy.
Sársenbi kúni Japonıanyń ortalyq jáne shyǵysynda, sonyń ishinde Tokıoda 80 mıllımetrge deıin jańbyr jaýady dep kútilýde.
Osyǵan deıin Japonıada taıfýn saldarynan sý tasyp, 200 myńǵa jýyq úı jaryqsyz qalǵanyn habarlaǵan bolatynbyz.