Japondyqtar qazaqstandyq qoǵamnyń birigý maqsattaryn qoldaıtyndaryn jetkizdi
Naýryz meıramy qarsańynda, sondaı-aq Qazaqstan men Japonıa arasyndaǵy dıplomatıalyq qarym-qatynastardyń ornatylǵanyna 30 jyl tolýyna oraı Japonıadaǵy QR elshiligi japon dostarynyń qatysýymen dóńgelek ústel uıymdastyrdy, dep habarlaıdy Almaty-akshamy.kz.
Sonymen qatar is-shara barysynda «Dostyq» ordeni jáne «Qazaqstan Táýelsizdigine 30 jyl» medalimen marapattaý rásimi ótti.
Dóńgelek ústel barysynda Qazaqstan Prezıdenti Qasym-Jomart Toqaevtyń «Jańa Qazaqstan: jańarý men jańǵyrý joly» atty Qazaqstan halqyna Joldaýynyń negizgi tustary talqylandy. Qatysýshylarǵa júzege asyrylyp jatqan saıası jáne áleýmettik-ekonomıkalyq reformalardyń barysy týraly baıandaldy.
Qazaqstandy odan ári damytýǵa jáne qoǵamymyzdy demokratıalandyrýǵa yqpal etetin sýperprezıdenttik formadan parlamenti kúshti prezıdenttik respýblıkaǵa kóshý sıaqty mańyzdy saıası bastamalarǵa erekshe nazar aýdaryldy.
Qazaqstan Elshisi Sabr Esimbekov Memleket basshysynyń joldaýynda azamattardyń memlekettik basqarý isine qatysý deńgeıin arttyrý maqsaty aıqyndalǵanyn atap ótti. Dóńgelek ústel qatysýshylary memlekettiń tıimdiligin, saıası úderisterdiń ashyqtyǵy men básekege qabilettiligin odan ári arttyrý mindetterin qoldady. Qazaqstannyń japondyq dostary sonymen qatar bolashaq ilgerileýdiń basty faktory retinde qazaqstandyq qoǵamnyń birigý maqsattaryn qoldaıtyndaryn jetkizdi.
Óz kezeginde, qatysýshylar ekijaqty yntymaqtastyqtyń jaı-kúıi men bolashaǵyn talqylap, Qazaqstan men Japonıa arasyndaǵy ózara yqpaldastyqty keńeıtýdiń jańa baǵyttaryn belgiledi.
Sonymen qatar, QR Prezıdenti Q.Toqaevtyń jarlyqtarymen marapattalǵan, HH ǵasyrdyń basyndaǵy qazaq zıalylarynyń tarıhyn zertteýshisi, Hokkaıdo ýnıversıtetiniń profesory Tomohıko Ýıamaǵa İİ dárejeli «Dostyq» ordenin jáne 1993-1996 jyldar aralyǵynda Qazaqstanda qyzmet atqarǵan Japonıanyń Qazaqstandaǵy tuńǵysh elshisi Akıra Masýıge «Qazaqstan Táýelsizdigine 30 jyl» mereıtoılyq medalin tapsyrý rásimi ótti.
Marapattalǵandar Memleket basshysyna jáne Qazaqstan halqyna joǵary nagradalar úshin alǵys bildirip, Qazaqstannyń odan ári gúldene berýin tiledi. Profesor T.Ýıama bul nagradany búkil ǵylymı-zertteý korpýsy men qazaqstandyq áriptesterine arnaıtynyn aıtyp, alǵys sezimi men jyly lebizin qazaq tilinde jetkizdi.