Almatylyq Erjan Jambaýovtyń shańyraǵynda qańtar aıynyń sońynda úshem dúnıege keldi
Alty balanyń ata-anasy atanǵan baqytty otbasyna kúni keshe «Elge kómek» qaıyrymdylyq qorynyń bastamasymen baspana kilti berildi, dep habarlaıdy Almaty-akshamy.kz
Qala tazalyǵy qyzmetinde jumys isteıtin erli-zaıyptylar buǵan deıin kóp qabatty úıdiń jertólesin panalap kelgen. Bul jaı izgilikke ińkár jandardy beıjaı qaldyrǵan joq. Osyǵan deıin 12 otbasyna páter kiltin tabystaǵan «Elge kómek» qory atalǵan másele týraly jelige áserli beınerolık jarıalaǵan edi. «Kóp túkirse - kól» degendeı, úı alýǵa qajetti soma táýlik ishinde jınalyp, qaıyrymdy iske el azamattary ún qosqan.
«Úshemderdiń ómirge kelýi – sırek kezdesetin jaǵdaı. Jambaýovtar otbasynyń jertólede ómir súrip jatyr degenin estigende, olardyń úshemderden bólek úsh uly baryn bilgende, kómek qolyn sozǵymyz keldi. Úshemderdiń jańa ómiri jańa úıde bastalǵanyn qaladyq. Arnaıy beınerolık daıyndap, paraqshamyz arqyly kópshilikke usyndyq. Qaıyrymdy jandar az ýaqyttyń ishinde óz úlesterin qosyp, qala irgesinen keń aýlasy bar jaıly baspana buıyrdy»,– deıdi ıgi iske bastama bolǵandar.
Alty balanyń ákesi Erjan Jambaýovtyń qýanyshynda shek joq. Eń úlken armanymnyń biri oryndaldy degen ol jaqsylyqqa úles qosqan jandarǵa alǵysyn bildirip, baspana kiltin qolyna alǵan sátte kóz jasyna erik berdi. Budan bylaı barlyq kúsh-jigerin balalaryn oqytýǵa arnaıtynyn aıtyp, aǵynan jaryldy.