Jalaqy mólsheri 30 AEK-ke deıin ulǵaıady.
Qazaqstan Úkimeti birqatar qujattarǵa ózgeris engizip, jastar men halyqtyń osal toptaryna kórsetiletin qoldaý sharalaryn arttyrýdy kózdep otyr, dep habarlaıdy Almaty-akshamy.kz.
«QR Eńbek jáne halyqty áleýmettik qorǵaý mınıstrligi 2022 jylǵy 11 qańtarda QR Parlamenti Májilisiniń otyrysynda Memleket basshysynyń halyqqa kórsetiletin jumyspen qamtý sharalarynyń tıimdiligin arttyrý boıynsha bergen tapsyrmalaryn oryndady», - delingen Eńbek mınıstrliginiń baspasóz qyzmetiniń habarlamasynda.
Resmı málimet boıynsha, tapsyrmalardy oryndaý sheńberinde aǵymdaǵy jylǵy 7 aqpanda «Halyqty jumyspen qamtýǵa járdemdesýdiń keıbir máseleleri týraly» Qazaqstan Respýblıkasy Densaýlyq saqtaý jáne áleýmettik damý mınıstriniń 2016 jylǵy 14 maýsymdaǵy № 516 buıryǵyna jáne Kásipkerlik bastamashylyqqa járdemdesý jónindegi sharalardy uıymdastyrý jáne qarjylandyrý qaǵıdalaryna ózgerister engizildi.
«2016 jylǵy buıryqqa engiziletin ózgerister aıasynda jastarǵa jáne halyqtyń áleýmettik osal toptaryna beriletin bıznesti damytýǵa arnalǵan granttar kólemin 400 AEK-ke deıin (2022 jyly – 1,2 mln teńge) ulǵaıtý kózdelgen. Granttar berý jastar men halyqtyń áleýmettik osal toptaryn óz isin ashý úshin bastapqy quraldarmen qamtamasyz etedi. Aǵymdaǵy jyly barlyǵy 20 myń adamdy granttarmen qamtamasyz etý josparlanyp otyr», - delingen habarlamada.
Mamandardyń aıtýynsha, qaǵıdalarǵa engizilgen ózgeristermen "Jastar praktıkasy" jáne «Alǵashqy jumys orny» jobasyna qatysatyn jas mamandardyń jalaqy mólsherin 30 AEK-ke deıin ulǵaıtý, sondaı-aq jastar praktıkasyna jáne «Alǵashqy jumys orny» jobasyna qatysý merzimderin tıisinshe 12 jáne 18 aıǵa deıin ulǵaıtý kózdeledi.
Bul ózgerister jastardyń alǵan mamandyǵy boıynsha jumys ornyna sátti beıimdelýine jáne bekitilýine yqpal etedi.
Aǵymdaǵy jyly jastar praktıkasyna keminde 22 myń adamdy jiberý, sondaı-aq «Alǵashqy jumys orny» jobasyna keminde 3 myń jas adamnyń qatysýyn uıymdastyrý josparlanýda.