Almatydaǵy abattandyrý jumystaryna «Jańarý kúni» erekshe qarqyn qosty. Osy kúnge oraı Alataý aýdanynyń Darhan yqshamaýdanynda 150 aǵash otyrǵyzyldy. Igi iske aýdan ákimdigi, eriktiler men belsendi turǵyndar atsalysty.
Aýdandyq Kóriktendirý bóliminiń bas mamany Madıar Abýevtiń aıtýynsha, bul – keshendi kógaldandyrýdyń alǵashqy qadamy.
– Naýryz merekesine oraı osy jerge jóke men shaǵan aǵashtary egildi. Aldaǵy eki aıda taǵy 500 túp kóshet otyrǵyzý josparlanyp otyr. Buryn bul aýmaq qaraýsyz qalyp, beı-bereket qoqys alańyna aınalǵan edi. Biz munda turaqty túrde senbilikter uıymdastyryp, tazalyq jumystaryn júrgizip kelemiz. Kógaldandyrý – ekologıany jaqsartýdyń eń tıimdi joldarynyń biri, – dedi ol.
Darhan yqshamaýdanynyń turǵyny Dına Sarmantaevanyń aıtýynsha, aýmaq halyq qatysatyn búdjet jobasy aıasynda tipti de kórikti bola túspek.
– Buryn bul jer qaraýsyz, qoqystar úıilgen aýmaq edi. Endi ol balalar úshin taza ári jaıly oıyn alańyna aınalǵaly otyr. Jaqynda munda balalar alańy salynady, bul turǵyndardy qýantyp jatyr – deıdi ıgi is barysynda.
Alataý aýdanynda bıyl 3000-ǵa jýyq aǵash otyrǵyzý josparlanǵan. Bul jumysqa aýdan ákimdigi men merdiger uıymdardan bólek, jastar da belsendi qatysýda. Kóriktendirý bóliminiń bas mamany úderistiń qalaı júrip jatqanyn túsindirdi:
– Ótken jyly aýdan boıynsha 65 myń aǵash otyrǵyzylsa, onyń 5000-y qylqan japyraqty jáne japyraqty aǵashtar bolatyn. Bıyl bul kórsetkish arta túsedi dep kútilýde , – dedi M.Abýev.
Jaqyn arada kóshetter Raıymbek dańǵyly, Momyshuly kóshesi jáne Rysqulov dańǵyly boıyndaǵy bos jerlerge de otyrǵyzylmaq. Qalany kógaldandyrý ákimdik qana emes, qala turǵyndarynyń da qoldaýymen júzege aspaq.
Ekologıany jaqsartý – ár azamattyń jaýapkershiligi. Almatyny kórkeıtýge úles qosqysy keletin kez kelgen adam osyndaı bastamalarǵa qatysa alady.