Almatynyń polıseıleri jańajyldyq merekeniń qalaı ótkenin aıtty
Almaty turǵyndary men qonaqtary demalyp jatqanda, qutqarýshylar, polıseıler men dárigerler azamattardyń qaýipsizdigin qamtamasyz etti. Jańa jyldyń demalys kúnderi aıaqtalysymen, mamandar Óńirlik komýnıkasıalar qyzmetiniń alańynda tótenshe jaǵdaılar qyzmetiniń jumysyn qorytyndylady, dep habarlaıdy Almaty-akshamy.kz.
Megapolıstegi mereke kúnderi salystyrmaly túrde tynysh ótti, jappaı demalys oryndarynda oqys oqıǵa bolǵan joq. Bul týraly ÓKQ brıfıńinde Almaty qalasynyń polısıa departamenti Jergilikti polısıa qyzmeti basshysynyń orynbasary Dıas Dýanbekov málim etti.
Jańajyldyq mereke kúnderi kúndelikti júzdegen polıseı jumysqa shyqty. 2022 jyldyń 25 jeltoqsanynda qalada «Quqyqtyq tártip» jedel-profılaktıkalyq is-sharasy ótkizildi. PD qyzmeti men bólimsheleriniń jeke quramy qyzmettiń kúsheıtilgen nusqasyna aýystyryldy. Patrúldik polısıa jasaqtarynyń sany ulǵaıtylyp, jaıaý patrúldik marshrýttar ázirlendi.
«Adamdar kóp jınalatyn nysandarǵa, sondaı-aq merekelik jáne oıyn-saýyq sharalaryn ótkizýge arnalǵan oryndarǵa erekshe nazar aýdaryldy. Qabyldanǵan sharalardyń nátıjesinde aýyr jáne asa aýyr qylmystardyń aldyn alýǵa múmkindik týdy. Negizinen bótenniń múlkin urlaý faktisi basym boldy. 31 jeltoqsan men 3 qańtar aralyǵynda qalada bótenniń múlkin urlaýdyń 30 deregi tirkelse, onyń 24-i jedel izdeý barysynda izi sýymaı ashyldy», - dedi D.Dýanbekov.
Sonymen birge, bul kúnderi megapolıste 2 buzaqylyq, 1 tonaý oryn alǵan. Kúdiktiler qylmys ornynda ustaldy. Sonymen qatar, esirtkige qatysty eki qylmys anyqtaldy. Jalpy, polısıa qyzmetkeri atap ótkendeı, qalada jaǵdaı turaqty jáne baqylaýda.
Aıta keterligi, oblystyń polısıa departamentiniń qyzmetkerleri azamattarǵa jol qozǵalysy erejelerin saqtaý, ásirese, aýa raıynyń qıyn jaǵdaıynda birneshe ret eskertý jasaǵan.