Polısıa qyzmetkerleri úshin mereke kúnderi qalaı ótkeni jaıynda İshki ister mınıstrliginde aıtyldy.
Tártip saqshylary Jańa jyl merekesi qarsańyndaǵy úsh kúndik jumysty qorytyndylady. Vedomstvoda atap ótkendeı, “102” arnasyna 29 myńǵa jýyq qońyraý túsken, dep habarlaıdy Almaty-akshamy.kz.
Polisia.kz-tiń habarlaýynsha, negizinen azamattar tynyshtyqtyń buzylýyna, qoǵamdyq oryndarda alkogóldik ishimdikter ishýge shaǵymdandy, sondaı-aq buzaqylyq pen mas kúıinde kólik júrgizý faktileri týraly da málimdedi.
Ótken demalys kúnderi respýblıka boıynsha 715 qylmys jasaldy, onyń 485-i “izi sýymaı” ashyldy. Mysaly, polıseıler 68 urlyqty, sondaı-aq 5 tonaý men 29 buzaqylyqty ashty. Tártip saqshylary barlyq shuǵyl qyzmettiń qyzmetkerleri sıaqty mereke kúnderin kúsheıtilgen jumys rejıminde ótkizdi. Maqsat – qoǵamdyq jáne jol qaýipsizdigin qamtamasyz etý, qylmystyń aldyn alý jáne jedel ashý, sondaı-aq “nóldik tózimdilik” qaǵıdatyn iske asyrý.