Elimizde jańa óńirlerdiń qurylýyna baılanysty jeke jáne zańdy tulǵalarǵa buryn berilgen qujattaryn qaıta resimdeýdiń qajeti joq.
Memleket basshysy Qasym-Jomart Toqaevtyń Qazaqstan halqyna Joldaýy aıasynda Abaı, Ulytaý jáne Jetisý oblystaryn qurý týraly sheshim qabyldandy.
QR Ádilet mınıstrligi Tirkeý qyzmeti jáne zań qyzmetterin uıymdastyrý departamentiniń atap ótýinshe, qoldanystaǵy zańnamanyń erejelerine sáıkes bul reformalar jyljymaıtyn múlikke jáne zańdy tulǵalarǵa quqyqtardy tirkeý salasynda buryn berilgen qujattardy qaıta resimdeýdi talap etpeıdi, dep habarlaıdy Almaty-akshamy.kz QazAqparatqa silteme jasap.
«Jyljymaıtyn múlikke quqyqtardy memlekettik tirkeý týraly» zańnyń 6-babynyń 2-tarmaǵynda eldi mekender ataýynyń, kósheler ataýynyń, sondaı-aq úıler men ózge de qurylystardyń rettik nómiriniń (mekenjaıynyń) ózgerýin, kadastrlyq nómirlerdiń ózgerýin tirkeý Qazaqstan Respýblıkasynyń ákimshilik-aýmaqtyq qurylysyn reformalaýǵa baılanysty quqyq ıelenýshige júktelmeıdi jáne óteýsiz júzege asyrylady.
Osylaısha, jańa oblystardyń qurylýy, eldi mekenderdiń qaıta atalýy menshik ıelerin quqyq belgileıtin (mysaly: satyp alý-satý, syıǵa tartý sharty, paıdalanýǵa qabyldaý aktisi, ákimdiktiń qaýlysy jáne basqalary) jáne sáıkestendirý qujattaryna (jer ýchaskesine akti, jyljymaıtyn múlik obektisine tehnıkalyq pasport) osyndaı ózgerister engizý úshin tirkeýshi organǵa júginýge mindettemeıdi. Eldi meken ataýynyń ózgerýi jáne jyljymaıtyn múlik obektisi mekenjaıynyń basqa da derektemeleri (kóshe ataýy, ǵımarattyń, úı-jaıdyń rettik nómiri) «Mekenjaı tirkelimi» aqparattyq júıesimen ıntegrasıalyq ózara is-qımyl sheńberinde «Jyljymaıtyn múlik tirkelimi» Memlekettik derekqorynda avtomatty túrde jańartylady», - dep atap ótedi departamentten.
Vedomstvo málimetinshe, «Quqyqtyq aktiler týraly» zańnyń 43-babynyń 3-tarmaǵyna sáıkes azamattarǵa jańa mindetter júkteıtin nemese olardyń jaǵdaıyn nasharlatatyn normatıvtik quqyqtyq aktilerdiń keri kúshi bolmaıdy. Osyǵan baılanysty zańdy tulǵalardyń oblystardyń, eldi mekenderdiń burynǵy ataýy kórsetilgen resmı qujattary óziniń zańdy kúshin joǵaltpaıdy. Jańa oblystardyń qurylýy quryltaı qujattaryn (jarǵyny, satyp alý-satý sharttaryn jáne t.b.), sondaı-aq mórdi qaıta resimdeý jóninde ádilet organdaryn habardar etý jóninde zańdy tulǵalardyń ókilderine mindet júktemeıdi.
Azamattyq hal aktilerin memlekettik tirkeý týraly kýálikter aktilik jazbalarmen dálme-dál sáıkestendirilip jazylady. Jergilikti jerlerdiń ataýy sol kezde bolǵan ákimshilik-aýmaqtyq bóliniske sáıkestendirilip kórsetiledi, al memlekettik tirkeý orny – osy jergilikti jerde qazirgi ákimshilik bólinis boıynsha qyzmet kórsetetin tirkeýshi organ kórsetiledi. Qujattarda eldi mekenniń burynǵy ataýyn kórsetý olardyń jaramsyzdyǵyna ákep soqpaıdy. Qujattardy aýystyrý olardyń jaramdylyq merzimi ótken jaǵdaıda nemese olar joǵalǵan jaǵdaıda júzege asyrylady.