Buǵan deıin bastapqy turǵyn úı naryǵynda qolma-qol aqshany paıdalanýǵa shekteý engizý josparlanyp otyrǵany habarlanǵan – qurylys salýshylar barlyq mámileni bank arqyly júzege asyrýy kerek, dep habarlaıdy aqshamnews.kz
Bul Qazaqstanda josparlanǵan jalǵyz shekteý emes ekeni belgili boldy. "Krysha" portalynyń habarlaýynsha, senat turǵyn úı qurylysyna úlestik qatysý máseleleri týraly zań jobasyn maquldady. Qujatqa sáıkes qurylys kompanıalaryna kelesideı tyıym salynady:
ákimdiktiń ruqsatynsyz nemese Qazaqstandyq turǵyn úı kompanıasynyń (QJK) kepildiginsiz aqsha tartý – buryn bul máseleni sheshetin joldary boldy, endi olarǵa aıyppul salynady, tipti qurylys toqtatylady;
turǵyn úıdi qolma-qol aqshaǵa satý – qurylys salýshydan páter satyp alý boıynsha barlyq tólemdi tek bank arqyly qolma-qol aqshasyz jasaý;
úlestik qatysý shartyn qospaǵanda, satyp alýshylarmen kez kelgen mámile jasasý. Shart Qazreestrde tirkelýi kerek;
ruqsatsyz jarnamalaý – qurylys salýshy úleskerlerden qarajat tartýǵa ruqsat alǵannan keıin ǵana turǵyn úı keshenderin jarnamalaýǵa bolady.
Qazirgi ýaqytta buzýshylyqtar úshin eń joǵarǵy aıyppul mólsheri 300 aılyq eseptik kórsetkishke (AEK) teń, ıaǵnı 2025 jyly 1 179 600 teńge, biraq keıin ony 2 000 AEK, ıaǵnı 7 864 000 teńgege deıin arttyrý josparlanyp otyr.
Sanksıalardan bólek, zań jobasynda qurylys kompanıalaryna keıbir jeńildikter de qarastyrylǵan. Atap aıtqanda, qurylys salýshy úleskerlerdiń aqshasyn tarta alýy úshin onyń qurylysta 5 jyl emes, nebári 3 jyl tájirıbesi bolsa jáne osy ýaqyt ishinde kompanıa aýdany 5 myń emes, 3 myń sharshy metr bolatyn turǵyn úı salsa jetkilikti.
Al azamattarǵa keler bolsaq, túzetýler kúshine engennen keıin barlyq úlestik qatysý sharty jazbasha jáne elektrondy túrde jasalady jáne biryńǵaı aqparattyq júıede tirkelýge tıis. Qazaqstandyqtar barlyq aqparatty Úlestik qatysýshylardy qoldaý ortalyǵynan ala alady.
Túzetýler zańǵa prezıdent qol qoıyp, resmı jarıalanǵannan keıin kúshine enedi.