Elimiz boıynsha kúrdeli jóndeý jumystary júrip jatqan 250 mekteptiń 35-i óz merziminen keshigip jatyr.
Onyń ishinde Jambyl oblysy da bar. Jańa oqý jylynda aımaqta mektepterdiń jetispeýi másele týdyrýy múmkin. Óıtkeni óńirdegi kúrdeli jóndeý kórýi tıis 17 mekteptiń altaýynyń qurylysy tym kesh bastalǵan, dep habarlaıdy Almaty-akshamy.kz Qazaqstan.tv-ǵa silteme jasap.
Jóndeý jumysyna qurylysshy mamandar maýsym aıynyń sońy men shildede ǵana kirisken kórinedi. Buǵan memlekettik satyp alý jumysynyń baıaý júrgizilýi de sebep. Bilim basqarmasynyń mamandary merdigerlerdi asyqtyryp jatqanyn aıtady. Al qurylysy kesh bastalǵan Tarazdaǵy №28 mektepte 600 bala oqıdy. 50 jyl buryn salynǵan eski bilim oshaǵyn jańalaý jumystary ýaqytyly aıaqtalmaıtyn túri bar. Sondyqtan bilim uıasynyń basshylyǵy oqýshylardy onlaın oqytýdyń qamyna kirisip ketken.
«1-synypqa baratyndar men 9-11-synyp oqýshylary kórshi mektepte oqıdy. Óıtkeni bitirýshi synyptar dástúrli túrde oqýy kerek. Basqa synyptardy onlaın túrde oqytamyz dep otyrmyz. Biz bul usynysymyzdy Taraz qalalyq bilim bólimine joldadyq. Olar qoldap otyr», - deıdi №28 mektep dırektory Svetlana Gýrskaıa.
Aımaqtaǵy 17 mekteptiń kúrdeli jóndeýine 4,4 mlrd teńge bólingen.
Al qurylystyń keshigýine tender talaptarynan bólek merdigerge beriletin ruqsat qaǵazdyń kesh berilýi de sebep. Sondaı-aq jumysshylardyń tapshylyǵy da áser etken. Aıta keteıik, aımaq boıynsha 1 apatty jáne úsh aýysymdy 4 mektep bar.
«Qazirgi tańda qurylys esebinen bárine qarjy qarastyrylyp, jyldary 3 aýysymdy mektepterdiń máselesin sheshemiz dep josparlap otyrmyz. Al bir apatty mektep máselesi kelesi jyly sheshemiz dep otyrmyz. Óıtkeni memlekettik saraptamaǵa jobalyq smetalyq qujattamasy ótkizildi», - deıdi oblystyq bilim basqarmasynyń bólim basshysy Dınara Jańabaeva.
.