Oqý-aǵartý mınıstri Asqat Aımaǵambetov Bilim jáne ǵylym mınıstri kezindegi qyzmeti týraly esep berdi.
Onda ol jańa oqý jylynan bastap ýnıversıtet rektorlary halyq aldynda esep berip otyratynyn aıtty, dep habarlaıdy Almaty-akshamy.kz.
«Joǵary oqý oryndary komersıalyq emes, aksıonerlik qoǵam formasyna kóshirildi. Bul túsken tabysty memlekettik búdjetke jibermeı, ýnıversıtetti damytý úshin baǵyttaýǵa múmkindik beredi. Korporatıvtik basqarý – ýnıversıtetterdi damytýdyń óte perspektıvaly quraly. Árıne, bul reforma barlyq rektordyń kóńilinen shyqty dep aıtý qıyn, óıtkeni endi ýnıversıtet búdjetin tek rektor bir ózi ǵana baqylap, basqara almaıdy», - dep jazdy mınıstr óziniń Facebook paraqshasynda.
Onyń aıtýynsha, Dırektorlar keńesi men JOO basqarmalary rektor óz pozısıasyn qorǵaı alatyn alqaly organdar retinde áreket etedi.
Dırektorlar keńesine azamattyq qoǵam ókilderiniń kóptep tartylǵany da óte mańyzdy.
«Endi ulttyq joǵary oqý oryndary ǵana emes, barlyq ýnıversıtettiń rektorlary jyl saıyn qol jetkizgen akademıalyq kórsetkishter jaıynda ǵana emes, búdjettiń atqarylýy týraly da halyq aldynda esep berýi tıis», - dedi Asqat Aımaǵambetov.