QR Mádenıet jáne sport mınıstri Dáýren Abaevtyń tóraǵalyǵymen QR Úkimetiniń janyndaǵy respýblıkalyq onomastıka komısıasynyń otyrysy ótti.
İs-sharaǵa komısıa músheleri, onyń ishinde Senat depýtaty Murat Baqtıaruly, Májilis depýtaty Málik Qulshar, ǵylymı jáne saraptamalyq qoǵamdastyq ókilderi qatysty. Komısıa otyrysy aıasynda Shyǵys Qazaqstan, Qaraǵandy jáne Almaty oblystary ákimdikteriniń jańadan qurylǵan Abaı, Ulytaý jáne Jetisý oblystaryna ataýlar berý týraly usynystary qaraldy, dep habarlaıdy Almaty-akshamy.kz QazAqparatqa silteme jasap.
Sondaı-aq, memleket menshigindegi jekelegen nysandardy, sondaı-aq Nur-Sultan, Almaty, Aqtóbe, Qaraǵandy, Qyzylorda, Qostanaı, Pavlodar qalalaryndaǵy kóshelerdi qaıta ataý máseleleri qaraldy.
«Ózderińiz biletindeı, Memleket basshysy Qazaqstan halqyna Joldaýynda birqatar ákimshilik-aýmaqtyq ózgeristerdi atap ótti. Olardyń barlyǵy tereń ekonomıkalyq negizdemege ıe, orasan zor mýltıplıkatıvtik áseri bar. Degenmen eń bastysy - qoǵamdyq pikirdi eskerý mańyzdy. Endi Qazaqstanda óz oblys ortalyqtary bar jańa oblystar paıda bolady. Atap aıtqanda, Semeı qalasy jańa Abaı oblysynyń ortalyǵyna, Jezqazǵan jańadan qurylǵan Ulytaý oblysynyń ortalyǵyna aınalady, osyndaı ózgerister Almaty oblysyna da qatysty», - dedi mınıstr.
Kez kelgen qalany, eldi mekendi nemese kósheni qaıta ataý onomastıka salasyn retteıtin zańnama talaptaryna sáıkes júzege asyrylatynyn atap ótý qajet. Komısıa kelip túsken usynystardy qaraıdy jáne qorytyndy beredi. Oń qorytyndy bolǵan kezde qaıta ataý týraly sheshim Qazaqstan Respýblıkasy Prezıdentiniń Jarlyǵymen bekitiledi.
Otyrys qorytyndysy boıynsha komısıa músheleri ákimdikterdiń usynysyn maquldady. Jaqyn arada komısıanyń qorytyndysy daıyndalyp, zańnamaǵa sáıkes odan ári jumys isteý úshin oblystardyń ákimdikterine jiberiletin bolady.
Buǵan deıin respýblıkalyq onomastıka komısıasy Qapshaǵaı qalasyn Qonaev dep qaıta ataý týraly oń qorytyndy bergen bolatyn.