Birneshe aı demalys pen gastróldik saparlardan keıin Muhtar Áýezov atyndaǵy Qazaq ulttyq drama teatry 96-shy maýsymynyń shymyldyǵyn túrdi.
"Ónerden qýat almasa, tirshiliktiń shyraǵy sónedi"deıdi uly Muhtar Áýezov. İndetke baılanysty shekteýler boldy. Biraq adamnyń qarny toq bolǵanymen, rýhy qashan da ash bolmaýy kerek. Osy ashtyqtan saqtasyn dep otyrǵanda, aýyr kezeńniń qıyndyǵy seıilgen sıaqty. Sondyqtan myna sahna óz kórermenderin qatty saǵyndy. Teatrdyń ómiri sizderdiń qoldaryńyzda, kóńilderińizde, qoshemetterińizde, aǵaıyn!» – dep bastady sózin teatr dırektory E.Jýasbek. Óner ordasynyń kezekti ashylýyna oraı ótkizilgen is-sharada ol kórermenderdi jańa maýsymnyń ashylýymen quttyqtap, aldaǵy josparlarymen bólisti. Saltanatty jıynǵa teatr ártisteri men rejıserleri qatysty. Atap aıtsaq, teatr jáne kıno akteri Saıat Merekenov, rejıser Alma Kákisheva, akterler Baqtıar Qoja, Bekjan Turys, Asylbek Boranbaı men aktırısalar Dárıa Júsip, Shynar Janysbekova qatysty.
Sonymen qatar maýsymasharda kórermender nazaryna teatrdyń tarıhynan syr shertetin «Sahna sátteri» kórmesi usynyldy. Ol jerde sońǵy 40 jyl ishinde tarıh sahnasyndaǵy sátterdi beıneleıtin sýretter men bınokl, fotoaparat sıaqty qundy jádigerler qoıyldy. Kórme barysynda belgili fotograf Qalıǵumar Qabdeshev óz fotoalbomyn teatrǵa syıǵa tartty.
Mereıli maýsymnyń ashylý saltanaty M. Áýezovtiń «Abaı» spektaklimen jalǵasty. Óner ujymy ár jańa maýsymda M.Áýezovtyń bir shyǵarmasyn sahnalaýdy teatrdyń dástúrli túrde qalyptasqan úrdisi, jazylmaǵan zańy dep biledi. Spektáklde sýyq jyldar qoınaýynda halyq zaryna zar, halyq tilegine tilek qosqan uly gýmanısiń órshil beınesi daýyldy teńiz betinde talmaı qalyqtaǵan suńqardy kóz aldyńyzǵa ákeledi. Aıdar men Ajardyń basyn arashalap qalýy, jýandyqtyń jeńilýi, ádilettiń ornaýy – halyqtyń jeńisi, halyqtyń uly Abaıdyń jeńisi ekenin uǵýǵa bolady.
Teatr basshysy taǵy bir sózinde «Spektákl ol – tiri organızm. Qandaı týyndy bolmasyn, ol jańa dúnıe. Munda, eń bastysy, onyń aıtary bolýy kerek. Osy oraıda biz bul maýsymda kórermenge eki jańa spektákl usynǵaly otyrmyz. Onyń biri – «Qan men ter». Ol ótken ǵasyrda qazaq teatr óneriniń bólshegine aınalǵan úlken spektákl bolǵan. Biz sol pesaǵa oralyp, «Qan men ter. Aqbala» dep atap, áıel máselesin kótergeli otyrmyz», - dedi teatr E.Jýasbek. Qasıetti qarashańyraq osyndaı jaqsy jańalyqtarymen, jańa tynyspen óz kórermenderin jańa maýsymda kútedi.
