Soltústik Qazaqstan oblysynda jańa kirpish zaýyty ashyldy, dep habarlaıdy Almaty-akshamy.kz Egemen.kz-ke silteme jasap.
Soltústik Qazaqstan oblysynda jańa kirpish zaýyty ashylady degen áńgime osydan eki jyl buryn bastalǵan edi. Zaýyt Qyzyljar aýdanyndaǵy Podgornoe aýylynda salynady jáne bólinetin ınvestısıa kólemi 1 mlrd teńgeni quraıdy dep boljanǵan. Óndiris qýaty táýligine 150 myń kirpish óndirýge jetetini jáne 150 adamǵa jumys orny ashylatyny da aıtylǵan. Biraq bul kezde qatty órship bara jatqan indet aıaqqa tusaý salyp, jumys qarqyny baıaýlap qalǵan edi.
Podgornoe aýylynyń bul jobaǵa tartylýy da tegin emes. Óıtkeni eldi meken oblys ortalyǵynan bar bolǵany 30 shaqyrymdaı jerde ornalasqan jáne kirpishtiń negizgi shıkizaty – laıbalshyqty da jaqyn mańnan óndirýge bolady. Ózi úlken joldyń ústinde bolǵandyqtan qaladan qysy-jazy jumysshylardy jetkizýge de esh kedergi joq. Alaıda 2021 jyly alǵashqy ónimin beredi degen óndiristiń jumysy joǵaryda aıtylǵan sebeppen toqyrap qalǵan-tyn.
Biraq «SK Kırpıch» JSHS quryltaıshysy Garık Bernesán da alǵan betinen qaıtpaı, kirpish zaýytyn iske qosty. Óndiris oshaǵynyń ashylýyna oblys ákimi Qumar Aqsaqalov qatysyp,ónerkásiptiń alǵashqy ónimderimen tanysty.
Árıne, zaýyt tórt aıaǵynan teń basyp ketti deý qıyn, áli de jetilmegen jaǵy kóp. Quryltaıshynyń ózi jumys kúshine tolyq engende 160 adam jumys istep, aıyna 4,5 mln dana kirpishke deıin shyǵaratynyn aıtty. «Ázirge kirpishtiń eki túrin shyǵaramyz, qazir bir jeli ǵana iske qosylyp, 80 adam eńbek etip jatyr. Laıbalshyqty jergilikti oryndardan alamyz. Oǵan kómir qosyp kúıdirip, daıyn ónim shyǵaramyz», dedi ol.
Ónimniń qanshalyqty sapaly bolaryn ýaqyt kórseter, biraq jergilikti qurylys kompanıalaryna 110-120 teńgeden satylyp, kirpishti alystan tasytpaı, qurylystyń ózindik qunyn tómendetýge septigin tıgizeri haq.
Oblys ákimi Qumar Aqsaqalov mańyzdy joba 4 paıyzdyq ósimmen berilgen 800 mln teńgege boı kótergenin aıtty. Biz qurylys kompanıalaryna qajetti negizgi qurylys materıalyn jaqynnan tabýdy kózdep, kirpish zaýytyn salatyn ınvestordy uzaq izdedik. Sóıtip talabymyzǵa saı keletin ınvestordy eki jyl buryn taptyq. Endi, mine, jobanyń iske asyrylǵanyn kórip otyrmyz. Biz kompanıaǵa jer ýchaskesin de bes jylǵa tegin berdik. Túrli salyqtan da bosattyq. Kásiporyn qurylysyna ınvestordyń salǵanymen qosa eseptegende, barlyǵy 1,8 mlrd teńge qarajat quıyldy. Aldaǵy 2-3 aıda budan basqa da qurylys materıaldaryn jasaıtyn kásiporyndar ashýdy josparlap otyrmyz. Sóıtip jergilikti qurylys kompanıalaryn ishki materıaldarmen tolyq qamtamasyz etý jónindegi maqsatymyzdy oryndaımyz», dedi ol.
Kirpish óńdeýdi jaqsy ıgergen soltústikqazaqstandyqtar buryn oblysty ǵana emes, kórshiles óńirlerdi de qamtamasyz etetin. Endi Úkimettiń qoldaýymen sol jetistikti qaıtadan jandandyrýǵa jol ashylyp otyr.