Qańtar aıynan bastap ASHYQ qosymshasymen «jasyl» mártebesi bar adamdardyń kirýine ruqsat beriletin nysandar tizimi keńeıedi
Bul týraly Úkimet otyrysynda QR Densaýlyq saqtaý mınıstriniń mindetin atqarýshy Jandos Búrkitbaev aıtty, dep habarlaıdy Almaty-akshamy.kz Egemen.kz-ke silteme jasap.
«Saýda oıyn-saýyq ortalyqtaryna, saýda úılerine, sport ortalyqtary men fıtnes-ortalyqtarǵa, ıoga ortalyqtaryna, karaoke, baseın, saýnalarǵa, monshalarǵa, «Qazposhta» bólimshelerine, Halyqqa qyzmet kórsetý ortalyqtaryna ASHYQ qosymshasymen «jasyl» statýsy bar adamdardyń kirýine ruqsat berý jóninde qosymsha aldyn alý is-sharalaryn engizýdi usynamyz», - dedi ol.
Osy rette mınıstr mindetin atqarýshy atalǵan normany 2022 jyldyń 5 qańtarynan bastap engizýdi usynatynyn aıtty.
«Halyqty vaksına salý, jappaı revaksına jasaýdy arttyrý, sondaı-aq usynylatyn epıdemıaǵa qarsy is-sharalar eldegi jaǵdaıdyń nasharlaýyna jol bermeıdi», - dedi Jandos Búrkitbaev.