Psıhıatr-dáriger Rýslan Isaev jarqyraǵan sharap ta basqa sýsyndar sıaqty alkogolızmge ákelýi múmkin deıdi, dep habarlaıdy Almaty-akshamy.kz.
"Shampan adamdarǵa ózindik bir mártebeni, statýsty beretin sekildi kórinedi. Adamdar ony ishkisi kelmese de urttap kórýge qumar. Munda psıhologıalyq stereotıpter ról atqarady. Sýsynnyń hımıalyq erekshelikterine keletin bolsaq, táýeldilik shampandaǵy gaz kópirshikterine baılanysty emes. Máseleniń bári shampannyń quramynda kezdesetin etanoldyń jıyntyq mólsherinde. Sebebi bul sýsyn belgili bir ýaqyt ishinde alkogóldiń jınaqtalǵan konsentrasıasy bolady", - dep eskertti Rýslan Isaev.
Dárigerdiń aıtýynsha, shampanǵa degen qushtarlyq ýaqyt óte kele alkogólge táýeldilikke aınalýy múmkin. Ol táýeldiliktiń alǵashqy kezeńderinde keńes alý úshin mamandarǵa júginýge keńes berdi.
Jańa jyldyq merekelerde erekshe qyraǵylyq tanytý kerek. Sebebi kópkúndik merekeler kezinde adamdar jıi baqylaýdy joǵaltady.
Al narkolog Tatána Klımenko aǵzanyń qorǵanys júıeleri oǵan alkogóldik ıntoksıkasıanyń saldarymen biraz ýaqyt kúresýge múmkindik beretinin aıtqan. Biraq erte me, kesh pe olar ınfarkt, ınsýlt nemese uıqy bezi problemalary túrinde áser etedi. Sońǵy zertteýlerge sáıkes, alkogól sút bezi qaterli isiginiń damý qaýpin arttyrady.