Búgingi tańda elimizde turmystyq zorlyq-zombylyq máselesi, burynǵy Keńes Odaǵynyń kóptegen elderindegideı, óte ózekti jáne ótkir taqyryp. Birqatar adamdar psıhologıalyq turǵydan da úı tıranynyń qurbandary atanýda.
Osy jaǵdaıdyń aldyn alý maqsatynda Nurjan Jasuzaqovtyń jetekshiligimen «Gúlbolsyn» jobasy ázirlenip, kómekke muqtaj jandarǵa qoldaý kórsetilýde. Atalmysh is-shara qalamyzdaǵy aq jaýlyqty abzal jandardyń quqyqtaryn qorǵaýǵa baǵyttalǵan. «Daǵdarys ortalyqtarymen birikken jobamyzǵa 10-nan astam adam tartylǵan. Bul jerde óz salasynyń mamandary, psıhologtar, zańgerler, reprodýktologtar men jattyqtyrýshylardy kezdestirýge bolady. Top jumysy erte jastan jynystyq qatynastyń aldyn alý, júktilik jáne sýısıdpen kúresýge baǵyttalǵan», – deıdi uıymdastyrýshy Aqnur Ospanova.
Joba 2021 jyldyń jeltoqsanyna deıin jalǵasady. Eriktiler bul jobanyń taqyrybyna oraı bolashaqqa úlken josparlar qurýda. Olar «joba tek Almaty qalasyn ǵana emes, búkil Qazaqstandy qamtýy qajet» deıdi. Sonymen qatar, «Volonterlar lıgasy» uıymy ár salada jetistikke jetken aıaýly jandardy bir salaǵa toptastyratyn «Aıaýly jan» jobasyn qolǵa alǵan. Bul – ǵylymda, kınoda, jýrnalısıkada, menedjment salasynda jetistikke jetken myqty áıelder týraly joba. İs-shara barysynda ártúrli trenıńter, spıker áıeldermen master-klastar ótý josparlanýda.
«Jalǵyzbasty analarǵa kórsetilip otyrǵan kómek óte az. Menińshe, bolashaqta alıment máselesin sheshý boıynsha arnaıy qor qurý qajet. Qoǵam kóp jaǵdaıda kináni áıeldiń moınyna ilip qoıady. Bizde «ajyrassa da, kúıeýi qol kóterse de, múgedek bala týsa da, áıel kináli» degen túsinik qalyptasqan. Sondyqtan kóp jaǵdaıda áıelder zorlyqqa shydaıdy. Qazaqstanda 400 myńnan asa jalǵyzbasty ana bar. Bul – bizdiń qoǵamdaǵy asa ózekti máseleniń biri. Balaǵa kózi ashyq, sanasy oıaý ana kerek. Anasy bilimsiz bolsa, balasy da bilimsiz bolyp ósedi. Qalaı bolǵanda da, balany qaraıtyn áıel», – deıdi Miss ATU–2017, Dinara Cosmetics brendiniń negizin qalaýshy Dınara Joldasova.