Básekelestikti qorǵaý jáne damytý agenttigi otandyq avtoóndirýshilerdi lızıńti qarjylandyrý erejelerinen básekelestikke qarsy normalardy alyp tastaý týraly nusqama engizdi, dep habarlaıdy almaty-akshamy.kz vedomstvonyń baspasóz qyzmetine silteme jasap.
QR Básekelestikti qorǵaý jáne damytý agenttigi «QazAvtoProm «Qazaqstannyń avtomobıl salasy kásiporyndarynyń odaǵy« ZTB ótinishin qaraý nátıjesi boıynsha QR Indýstrıa jáne ınfraqurylymdyq damý mınıstrligine jáne «Ónerkásipti damytý qory» AQ-ǵa qoldanystaǵy baǵdarlamalardan jáne otandyq avtoóndirýshilerdi lızıńti qarjylandyrý erejelerinen básekelestikke qarsy normalardy alyp tastaý týraly nusqama engizdi.
«Qazirgi ýaqytta otandyq avtoóndirýshilerdi qarjylandyrý maqsatynda QR Indýstrıa jáne ınfraqurylymdyq damý mınıstrligi (IIDM) bekitken «Báıterek «UBH «AQ kredıtteý» qarjylyq-ekonomıkalyq negizdeme baǵdarlamasy boıynsha «Ónerkásipti damytý qory» AQ (buryn – «QDB-lızıng» AQ) kredıtteý júrgizýde. Osy baǵdarlamada aıqyndalǵan qarjylandyrý tetigine sáıkes Qazaqstandyq avtobıznes qaýymdastyǵy (QABQ) árbir avtoóndirýshige lızıńtik qarjylandyrý kezindegi lımıtter somasyn aıqyndaıdy», delingen habarlamada.
Vedomstvonyń málimdeýinshe, osyǵan uqsas normalar «Ónerkásipti damytý qory» AQ-nyń otandyq avtomobılder óndirisin qoldaý boıynsha lızıńtik qarjylandyrý baǵdarlamasynda jazylǵan. Bul rette QABQ – quramyna avto óndirý naryǵynda jumys isteıtin kásiporyndardyń barlyǵy kirmeıtin komersıalyq emes uıym. Sondaı-aq, bul eldegi avtokólik óndirýshiler men jınaýshylardyń jalǵyz birlestigi emes.
«Osylaısha, IIDM jáne QABQ Ónerkásipti damytý qory tarapynan qaýymdastyq músheleri bolyp tabylatyn avtoóndirýshilerdiń múddelerine basymdyq berý quqyǵy berilgen, bul olar úshin artyqshylyqty jaǵdaı jáne jalpy básekelestermen salystyrǵanda qolaısyz / dıskrımınasıalyq qyzmet jaǵdaıyn qalyptastyrady», dep málimdedi agenttik.
Vedomstvonyń túsindirýinshe, avtoóndirýshilerge lızıńti qarjylandyrý boıynsha qarajat bólý kezinde ashyqtyqtyń bolmaýy, jeke kásipkerlik sýbektileriniń basym jaǵdaıyn belgileý faktileri, lızıń alatyn avtoóndirýshilerdi tańdaý kezindegi shekteýler – osy máseleler 2021 jyldyń qyrkúıeginde Nur-Sultan qalasy boıynsha monopolıaǵa qarsy departament janyndaǵy kedergiler jónindegi keńes otyrysynda kóterilgen.
«Qazaqstan Respýblıkasynyń Básekelestikti qorǵaý salasyndaǵy zańnamasynyń buzylýy týraly málimetterdi taldaý nátıjeleri boıynsha QR Kásipkerlik kodeksiniń 163-babynyń 4-tarmaǵyna sáıkes IIDM jáne Ónerkásipti damytý qorynyń atyna básekelestikti qamtamasyz etýge baǵyttalǵan is-áreketter jasaý týraly nusqama, atap aıtqanda, básekelestikti shekteıtin normalardy alyp tastaý engizildi. Nusqama 2021 jyldyń 30 qarashasyna deıin oryndalýǵa tıis», - delingen habarlamada.