Memleket basshysynyń arnaıy tapsyrmasyna oraı, QazBSQA qurylys kolejinde biregeı bilim berý jobasy ashyldy. «Bakarassov konserni» JSHS jáne TM «KAIZER.» ınovasıalyq lak-boıaý ónimderin shyǵaratyn nemis zaýytymen birlesken jobanyń ashylýyna qalalyq Máslıhat depýtaty, AMANAT partıasynyń múshesi Elena Bakarasova muryndyq boldy.
– Prezıdentimiz Qasym-Jomart Toqaevtyń aǵymdaǵy jyldy «Jumysshy mamandyqtary jyly» dep jarıalaýy bizge úlken serpin berip, zor jaýapkershilik júktep otyr. Biz endi elimizdegi qurylys mamandaryn daıarlaıtyn eń aldyńǵy oqý ordasymen birlese eńbek etetin boldyq. Memleket basshysy «Kásiptik bilim berý salasyna reforma jasaý – aıryqsha ózekti másele. Bul – ekonomıkanyń ósimin qamtamasyz etý jáne ınvestısıalyq tartymdylyǵyn arttyrý úshin asa qajet qadam. 2025 jyldy «Jumysshy mamandyqtary jyly» dep jarıalaǵandyqtan, osy ýaqyt ishinde tehnıkalyq jáne kásibı bilim berý júıesin reformalaý qajet. Sondaı-aq, biz jumysshy mamandyqtaryn dáripteý arqyly qoǵamda eńbekqor jáne naǵyz maman bolý ıdeıasyn nasıhattaımyz», – degen edi. Qazir biz óz tarapymyzdan osy tapsyrmany oryndaýǵa belsene kirisip jatyrmyz, – dedi qalalyq Máslıhat depýtaty Elena Bakarasova.
Atalmysh joba QazBSQA kolejiniń stýdentteri úshin premıým-materıaldarmen jumys isteýde taptyrmas tájirıbe alańyna aınalary sózsiz. Bul, eń aldymen, bolashaq mamandardyń kásibı damýy úshin mańyzdy qadam. Olar qurylys salasyndaǵy zamanaýı tehnologıalardy ıgerip qana qoımaı, naqty nysandarda jumys isteýge de zor múmkindik alatyn bolady.
– Kolejimizde bes mamandyq boıynsha 600-den astam stýdent bilim alyp jatyr. Jańadan ashylyp jatqan tájirıbe alańy bizdiń stýdentterimizdiń sapaly bilim alýmen qatar, kásibı maman bolyp shyǵýyna kepildik bereri sózsiz. Stýdentter munda úsh tásildi ıgeredi. Olar teorıalyq bilim, sheberlik synyptary men tájirıbe almasady. Sondaı-aq, bizdiń seriktesimiz KAIZER qajetti materıaldarmen qamtamasyz etip otyr. Tájirıbe alańynda stýdentterimiz árleý, levkastaý, boıaý sıaqty qurylys jumystaryna mashyqtanady. Halyqaralyq standarpen jumys jasaıtyndyqtan atalmysh zaýyt mamandary sheberlik sabaqtaryn ótkizip, qosymsha dáris beretin bolady, – deıdi kolej basshysy Erasyl Mamyrbekov.