«Almaty aqshamy» – «Vechernıı Almaty» basylymdary kýbogyna arnalǵan jarys óz máresine jetti.
«Almaty aqshamy» – «Vechernıı Almaty» utysy úshin fýtboldan ardargerler arasyndaǵy jarys aldyńǵy jyldyń qarasha aıynda bastalǵan. 14 komanda qatysqan týrnırdiń jeńimpazy ótken jeksenbi kúni ǵana belgili boldy.
Qazaqstandyq fýtbol ardageri Nurlan Atantaev jetekshilik etetin «Medık» komandasy chempıon atandy. Onyń komandasynda ataqty fýtbolshy ári jattyqtyrýshy Vahıd Masýdov, sondaı-aq, Vladımır Nıkıtenko, Talǵat Nurjanov, lıga aqsaqaldarynyń biri Anatolıı Ten (ol 72 jasta) jáne ózge oıynshylar boldy. Sheshýshi oıynda olarǵa «Qaısar», «Qaırat» jáne QR Ulttyq qurama sapynda oınaǵan Marat Esmuratov jetekshilik etetin «Qarshyǵa»
komandasy qarsy oınady. Bir qyzyǵy, atalmysh komandalar buǵan deıingi jarysta da kýbokty ózara sarapqa salǵan bolatyn (5:3 esebimen «Medık» komandasy jeńgen).
Chempıon ataný úshin «Qarshyǵa» komandasyna tek jeńis, al «Medık» ujymyna tek teń nátıje de jetkilikti edi. Oıynda 3:2 esebimen Nurlan Atantaev komandasy basym túsip, «Medık» bıyl da týrnır jeńimpazy atandy. Jarys kestesinde «Sultan Qorǵandy» 9:0 esebimen jeńgen «Arlan» ekinshi orynǵa, al jeńilisten keıin «Qarshyǵa» úshinshi orynǵa jaıǵasty.
Jeńimpazdardy «Alataý Aqparat» JSHS bas dırektory Tólemis Kúlmuhamedov marapattap, kýbokty tabystady.
«Sizder sport pen salaýatty ómir saltynyń naǵyz nasıhattaýshysysyzdar. Sizderdiń oıyndaryńyzǵa qarap, fýtbol alańyna jastar úıirilip, balalar men nemerelerińiz kelýde. Bul bastama ardargerler arasyndaǵy jańa jarystardyń ashylýyna sebepshi bolatynyna senemiz. Biz óz tarapymyzdan mundaı ıgi sharalardy árdaıym qoldap turamyz. Bul bizdiń sońǵy kezdesýimiz bolmaýyn tileımin», – dep Tólemis Baqtybaıuly mundaı jarystardyń
mańyzdylyǵyn atap ótti.
Sonymen qatar, fýtbolǵa degen súıispenshiligi úshin redaksıa atynan syılyqtar berildi. Marapatty Nurlan Atantaev («Medık»), Azat Nildibaev jáne Kárim Ospanov (ekeýi de «Aqparat»), Qaınar Seıilov, Smaıylhan Tákenov («Sultan-Qorǵan»), Jamanbaı Qýanyshev («Ardager»), Anatolıı Ten («Medık»), Ǵalym Ermahanov jáne Tursyn Qusaıynov (ekeýi de «Aqparat») ıelendi.