SHOB ókilderinen túsken barlyq ótinimder 100% qamtyldy jáne qaraldy. Bul týraly Óńirlik komýnıkasıalar qyzmetiniń brıfıńinde qalalyq kásipkerlik jáne ınvestısıalar basqarmasynyń basshysy Erkebulan Orazalın málimdedi, dep habarlaıdy Almaty-akshamy.kz
Shaǵyn jáne orta bızneske keltirilgen zalaldy óteý jónindegi óńirlik komısıa ótinishterdi qysqa merzimde qarap, memlekettik qoldaý kórsetip, qala ekonomıkasyn qalpyna keltirýdi jedeldetti.
Erkebulan Orazalın atap ótkendeı, Info Kazakhstan elektrondy platformasyna 1188 kásipkerden 1355 ótinim kelip tústi.
Óńirlik komısıa otyrysynyń qorytyndysy boıynsha jalpy somasy 5 286 mln teńge bolatyn 1139 ótinim maquldandy, onyń ishinde búdjet qarajatynan 4 194 mln teńge somasyna 595 ótinim, «Jańa Alataý» qory qarjysynan 1 091 mln teńge somasyna taǵy 544 ótinim bar.
«Negizinen saýda jáne qyzmet kórsetý sektory zardap shekti. Ótinimderdiń kópshiligi azyq-túliktik emes taýarlardy, aıaq kıimderdi, kıimderdi satýmen aınalysatyn kásipkerlerden, sondaı-aq turmystyq tehnıkany, zergerlik buıymdardy satatyn saýda-oıyn-saýyq ortalyǵynyń aýmaǵynda ornalasqan aıyrbastaý pýnktteri men dúkenderdiń ıelerinen kelip tústi», - dedi E. Orazalın.
Qalǵan 216 ótinim pysyqtaýǵa jiberildi (óıtkeni 120-sy boıynsha qujattardyń tolyq emes paketi usynyldy, 96-y jeńildetilgen tetik aıasynda tólem somasy boıynsha kelispeýge baılanysty sot saraptamasyna jiberildi).
Zardap shekken bıznesti tolyq qamtý jáne qala ekonomıkasyn tezirek qalpyna keltirý maqsatynda Komısıa hatshylyǵy qujattardyń tolyq paketin usyný boıynsha kómek kórsetý úshin Qoldaý kásipkerlik ortalyǵynyń janynan konsýltasıalyq shtab ashty.
Ótemaqy áli tólenbegen zardap shekken kásipkerler keńes alý úshin jumys kúnderi 9.00-den 18.00-ge deıin myna mekenjaı boıynsha: Almaty qalasy, Baızaqov kóshesi, 303, 101 kabınetke júgine alady.
Óńirlik komısıanyń kelesi otyrystary 2022 jylǵy 12, 15 jáne 18 naýryzǵa josparlanǵan.
Brıfıńke Almaty qalasy kásipkerler palatasynyń dırektory Aıtýar Qoshmambetov qatysyp, zardap shekken bıznesti qoldaý úshin «Kúsh – birlikte» qory qurylǵanyn habarlady. Komısıa sheshiminen keıin qor qarajaty obektileri tonalǵan jáne buzylǵan Almatydan jáne basqa óńirlerden kelgen kásipkerlerge bólinedi.