El Prezıdenti Qasym-Jomart Toqaev «Ádiletti memleket. Birtutas ult. Berekeli qoǵam» Joldaýynda damýdyń negizgi baǵyttaryn aıqyndap berdi.
Jańa Joldaý ekonomıkalyq júıeni jańǵyrtýdyń keshendi jáne tujyrymdamalyq tásilderimen erekshelenedi. Naýryzdaǵy Joldaý barysynda Memleket basshysy qyrkúıekte Qazaqstandy odan ári damytýdyń negizgi usynystary men qaǵıdattaryn usynatynyn málimdegen bolatyn. Prezıdenttiń otandastarymyzdyń ıgiligine baǵyttalǵan saıası pragmatızmin, júıeli jumysy men aıqyn maqsattaryn kórip otyrmyz.
Ekonomıkalyq máselelerdi sheshý jáne salalar arasyndaǵy tıimdi tetikterdi qurý úshin Jańa ekonomıkalyq saıasat prınsıpteri usynyldy.
⮚ Birinshi. Kásipkerlik bastamany yntalandyrý, memlekettik kapıtalızmnen jáne ekonomıkaǵa shekten tys aralasýdan bas tartý. Bul jerde atap ótkim keletini, álemniń damyǵan ekonomıkalarynyń qalyptasýyn taldaý memleket ekonomıka salalaryn kásipkerlik ortaǵa, ıaǵnı básekelestik ortaǵa beretinin kórsetedi. Jahandyq básekege qabilettilik ındeksi boıynsha álem elderiniń reıtıńisinde «Kompanıalardyń básekege qabilettiligi» degen jeke kórsetkish bar. Bul memlekettiń ekonomıkaǵa aralasýyn azaıtýdyń qanshalyqty mańyzdy ekenin kórsetedi.
⮚ Ekinshi. Básekelestikti damytý, ıaǵnı barlyǵyna teń múmkindikter berý.
Osy oraıda nazar aýdarǵym keletini, startap ashýǵa, jumys istep turǵan bıznesti keńeıtýge nemese kásipkerlikte jańa baǵyttardy ashýǵa birdeı múmkindikter bolǵan kezde qýatty ekonomıka qalyptasady. Turaqty ekonomıka – shaǵyn jáne orta bıznestiń úlken sektory qalyptasqan ekonomıka ekenin bárimiz jaqsy bilemiz. Qazaqstanda jumys istep turǵan shaǵyn, orta kásiporyndardyń jalpy sany 1,4 mıllıon sýbektige jetti, bul salada jumys isteıtin adamdar sany 3,5 mıllıondy quraıdy. Osy rette bul kórsetkish sanmen ǵana ólshenbeıtinin, eń bastysy – kásiporyndardyń sapasy men turaqtylyǵy ekenin atap ótkim keledi.
⮚ Úshinshi. Ulttyq tabysty ádil bólý. Prezıdenttiń balalar kapıtalyn qalyptastyrý týraly sheshiminiń strategıalyq mańyzy bar dep esepteımin. Óıtkeni, balalar – bizdiń kemel keleshegimiz. Elimizdiń barlyq balasy kámeletke tolǵanǵa deıin joǵary oqý oryndaryna nemese baspanaǵa bastapqy kapıtal alady. Bul memlekettik qoldaý sharasy Qazaqstandaǵy otbasylarǵa tikeleı kómek kórsetedi.
Qorytyndylaı kelgende, Joldaý el damýynyń sapaly jańa modelin júzege asyrýdy, Qazaqstannyń uzaq merzimdi ekonomıkalyq ósiminiń turaqtylyǵyn qamtamasyz etedi.