«Jańa Almaty» keshendi damý jospary barlyq almatylyqtardyń teń jaǵdaılarda sapaly ómir súrýlerine baǵyttalǵan
Almaty qalasynyń ákimi Baqytjan Saǵyntaev QR Prezıdentiniń janyndaǵy Ortalyq komýnıkasıalar qyzmetinde ótken baspasóz konferensıasynda sýmen jabdyqtaý jáne sýdan burý júıesiniń qurylysy, kóshe jaryǵy jáne qalaǵa qosylatyn shaǵyn aýdandardyń joldary týraly aıtty, dep habarlady Almaty-akshamy.kz.
Keshendi damý jospary (KDJ) 2020-2024 jyldarǵa arnalǵan jáne jyl saıyn shamamen 200 mlrd teńge kóleminde jobalyq qarjylandyrýdy qarastyrǵan. Jobany qarjylandyrýdyń jalpy somasy 943,7 mlrd teńgeni quraıdy.
Búginde KDJ aıasynda qala shetinde kólik, bıznes jáne áleýmettik ınfraqurylymdy jaqsartý boıynsha 286 joba júzege asyrylýda.
Bıylǵy jyldyń basynan beri Almatyda 40,5 shaqyrym sýmen jabdyqtaý jáne 12,5 shaqyrym káriz jelilerin tartý jumystary júrgizildi. 75 myńnan astam turǵyndar turatyn 17 shaǵyn aýdanda komýnıkasıalar qurylysy júrip jatyr.
Naýryzbaı aýdanynda «Qarǵaly» sý qabyldaý jáne súzý stansıasynyń qurylysy júrip jatyr. Aqsaı ózeninde osyǵan uqsas nysandy jobalaý aıaqtalýǵa jaqyn. Osy strategıalyq nysandar paıdalanýǵa berilgende 130 myńnan astam turǵyndar taza aýyz sýmen turaqty qamtamasyz etiledi.
Jaıly jaǵdaılar jasaý jáne qoǵamdyq qaýipsizdikti qamtamasyz etý maqsatynda qalany jaryqtandyrý jumystary keńinen júrgizilýde. Megapolıstiń barlyq kóshelerine syrtqy jaryq ornatý mindeti qoıyldy. Jyl basynan beri 508 kóshedegi jumys aıaqtaldy. Qalǵan 601 kósheni jaryqtandyrý josparlanǵan. Nátıjesinde qalanyń barlyq kósheleri jaryqtandyrylady.
Almatynyń 49 kóshesinde ortasha jol jóndeý jumystary júrgizildi, 41 kóshede jumys jalǵasýda. Bıylǵy jyly uzyndyǵy 227,5 km bolatyn 225 kósheni jóndeý josparlanǵan. Onyń ishinde 18 kóshe magıstraldy kóshelerge jatady, olar – Rysqulov dańǵyly, Sátbaev kóshesi, Soltústik aınalma, Súıinbaı dańǵyly, Qurmanǵazy kóshesi jáne t.b. Barlyq jumystardy qyrkúıek aıynda aıaqtataý josparlanǵan.
Qalada «Jańa Almatynyń» segiz shaǵyn aýdanynda – Quramys, Samǵaý, Shańyraq-5, Ójet, Nurshashqan, Qaırat, Álmerek, Alǵabasta jańa joldar salynýda. Jalpy uzyndyǵy 108 km bolatyn 415 kóshe asfálttalady.
Abaı dańǵylyn, Nurly jáne Saın kóshelerin tesý, úsh jolaıryǵyn salý jumystary jalǵasýda.
Jyl sońyna deıin Almatyda metronyń «Saryarqa» jáne «Dostyq» dep atalatyn eki beketiniń qurylysy aıaqtalady, 8 jańa elektr poıyzdaryn satyp alý josparlanýda.
Metropolıtenniń birinshi jelisiniń ekinshi kezeńiniń ekinshi iske qosý kesheni Abaı dańǵylynan tómen Altynsarın dańǵylynan batysqa qaraı Iassaýı kóshesine deıin ornalasqan. Keshen qýma tonnelderden jáne eki stansıadan turady: pılon tıpti tereń tóselgen «Saryarqa» jáne taıaz tóselgen «Dostyq» beketterinen turady. Mamandardyń esebi boıynsha, ekinshi keshen iske qosylǵannan keıin kún saıynǵy jolaýshylar aǵyny shamamen 85 myń adamdy quraıtyn bolady. Metropolıtende jolaýshylar tasymalynyń kólemi artyp, Abaı dańǵylynyń júktemesi azaıady.