Almaty ákimi Baqytjan Saǵyntaev QR Prezıdenti janyndaǵy Ortalyq komýnıkasıalar qyzmetinde ótken baspasóz konferensıasynda qala aýmaǵynyń sáýlettik kelbetin qalyptastyrýdyń jáne qala qurylysyn josparlaýdyń jańa talaptary týraly aıtty.
Jańa qurylys erejeleriniń basty ıdeıasy — Almatynyń tarıhı kelbetin saqtaý jáne qalpyna keltirý, qala qurylysyna qoıylatyn bazalyq talaptardy belgileý. Mysaly, halyqtyń tyǵyzdyǵy tarıhı ortalyqta gektaryna 300 adamnan, al basqa aýmaqtarda 440 adamnan aspaýy kerek. Turǵyn úıdiń ortasha qory bir adamǵa 18-25 sharshy metrden kem bolmaýy tıis.
Aýla keńistiginde qurylys salýǵa jol bermeý úshin aýla aýmaǵy bir adamǵa shaqqanda 10 sharshy metr bolýy jóninde norma engizildi, al qalǵan tórtten bir bóligi kógaldandyrylýy qajet.
Áleýmettik nysandardyń qadamdyq qoljetimdi bolýy úshin qurylys salýshy qurylys kezeńinde 1 myń adamǵa shaqqanda 100 orynnan kem emes balabaqsha, 1 myń adamǵa shaqqanda 180 orynan kem emes mektepter, emhanalar jáne polısıa pýnktterin salatyn oryndardy qarastyrýy tıis.
Tarıhı ortalyqqa mynadaı mindetti talaptar engizilgen: tarıhı ǵımarattardy qalpyna keltirý jáne saqtaý; qabattardyń sanyn shekteý; ǵımarattardyń jaqyn ornalasýyn baǵdarlaý; tarıhı ǵımarattardy súrýge jáne olardyń janynan bıznes nysandaryn salýǵa tyıym salý; qasbetterdiń jáne olardyń biregeıligin buzýǵa tyıym salý.