Turǵyndardy kúnine 3 mezgil aýyzsýmen qamtamasyz etý úshin arnaıy tehnıka bólindi
Jambyl oblysynda sel shaıǵan birneshe aýylda tótenshe jaǵdaı jarıalandy. Tabıǵı apattan kelgen shyǵyn kólemi 135 mıllıon teńgeden asqan, dep habarlaıdy Almaty-akshamy.kz.
23 maýsym kúni tolassyz jaýǵan jańbyrdyń sońy selge ulasyp, Qordaı aýdanyndaǵy Úlken Sulýtór jáne Noǵaıbaı eldimekenderin shaıyp ketken bolatyn. Nátıjesinde 17 úıdiń aýlasyn sý basyp, 5 úıdiń ishine kirgen. 12 úıdiń qora-jaılary men qorshaýlary búlindi, dep jazdy qazaqstan.tv.
Arnaıy qurylǵan komısıanyń málimetinshe, úsh aýyldan 169 qoı-eshki, 4 jylqy, 2 sıyr jáne 380 taýyq joǵalǵan. Sulýtór eldimekeninde aýyz sý júıesi, elektr jelileri isten shyqqan. Turǵyndardy kúnine 3 mezgil aýyzsýmen qamtamasyz etý úshin arnaıy tehnıka bólindi. Sondaı-aq taý sýy aýylishilik birneshe kópirdi shaıyp ketken.
Qazir onda arnaıy tehnıkalar men avarıalyq toptar jumyldyrylyp, qaıta qalpyna keltirý jumystary júrgizilýde. Aýyl turǵyndarynyń barlyq shyǵynyn memleket óteıdi.