Jospar 2025 jylǵa deıin júzege asýy kerek
Almatydaǵy avtobýs parki sý jańa 800 qoǵamdyq kólikpen tolyǵady. Jospar 2025 jylǵa deıin júzege asýy kerek. Bul aqparat búgin ákimdiktiń baspasóz qyzmeti jarıalaǵan qalanyń damý josparynda aıtyldy, dep habarlaıdy Almaty-akshamy.kz Almaty.tv-ge silteme jasap.
Qala turǵyndary úshin ózekti dep tanylǵan máselelerdiń qatarynda aıaldamalar men qoǵamdyq kólik jaıy da bar. Máselen, azamattar tarapynan túsken ótinishterdiń 11 paıyzy avtobýstyń jetispeýshiligine, marshrýttar men júrý kestesine qatysty eken. Endigide, atalǵan máseleni sheshý úshin 2025 pen 2030 jyldarǵa naqty jospar bekitilip otyr.
Almatyda 470 myń jeke kólik pen 230 myń avtomobıl syrtan keledi. Keptelister men qoǵamdyq kóliktiń qyzmetine qatysty aryz-shaǵymdar da osy arada týyndaıdy. Lyq toly avtobýstar men olardyń saǵatyna 20 shaqyrymnan da tómen jyldamdyǵy – kóptiń kókeıin tesken áýelgi másele ekeni anyq.
Atalǵan máselelerdi birjaqty etý úshin aldaǵy 3 jylda 200 jańa troleıbýs satyp alý, gazben júretin avtobýstar úshin 2 park, 5 gaz quıý beketin salý jáne zamanaýı formattaǵy 200 aıaldamany iske qosý kózdelip otyr. Sondaı-aq 2030 jylǵa deıin batys baǵytta metronyń jańa 3 beketi salý josparda bar. Jańadan 800 avtobýs qosylady.
«Negizi 800 az san emes, búginde bizdiń esebimiz boıynsha 1000-nan kem bolmaýy tıis. Qoǵamdyq keńeste men basqarǵan komısıanyń negizgi bir baǵyty - qoǵamdyq transport máseleleri. Sondyqtan, biz qala ákiminiń bergen osy maǵlumattaryn óte jaqsy qabyldadyq», – dedi qalalyq qoǵamdyq keńestiń ókili Borıs Japparov.
2025 jylǵa qaraı qoǵamdyq kóliktegi kúndelikti saparlar 1,7 mıllıonǵa deıin ulǵaıady dep kútilip otyr. Bul kórsetkish qazir shamamen 1,4 mıllıonnyń aınalasynda. Qalaı bolǵanda da, jyl saıyn shara qabyldaýdy talap etetin sala 2030 jylǵa deıin bir sheshimin tabýy tıis.